Masalimo 88 - Mawu a Mulluku

Nivekello na nikavihero

Wa oohoollella wiipa, voottakihani miipello a nchipo nawi Mahalati Leanoti. Salimo na edduullu dda Kora. Endakatulo ya Hemani mu Ezara.

¹ Nyu Apwiya Mulluku oovullusaaka, kinninllella otthaana ni mahiiyu.

² Nivekello naka niphiye vamiitthoni vanyu, kireyeni naaru wi mwiiwe winlla waka.

³ Vawi murimaaka wooddalla ni ddookatamiha, okumaaka onnaatamella o ellapo ya ookhwa.

⁴ Kinneerengiwa vamodda ni athu ookitthella o mahame, kootthattuwa muthu oohikhalla ni masiva.

⁵ Kiri wonanko oohiyiwa yeekha variyari va ookhwa, wonanko muthu awiiphiwa oyo akonaatthille mu mahame, wonanko athu ayo muhinawuupuwelleenyu, vawi tti oovenyihiwa m'mattani mwanyu.

⁶ Mookihiya vatthi va nlliti, mapuro oowallamella ni eepiphi.

⁷ Osha murima wanyu wookiphitteera, mookimirya ni mafundaanyu mattheene.

⁸ Mokimwallaniha ni akhwaaka, mookitthattusa ello yowaananara, koowallelliwa wawi ngiwora othawa.

⁹ Miitthwaaka aawa epiphi ni ethakaraka, nyu Apwiya, kinninllella wa nyuwaano nllapo ni nllapo, kinnatukhullella mattaaka muddullu wa nyuwaano.

¹⁰ Ethiyo munnaweerella ddoottikhiniha athu ookhwa? Ethiyo oonihiyaayo ttuuvenya wi yuuthokozeni?

¹¹ Ethiyo echikondaanyu yoohisintheya ennayillalleya o mahame? Ethiyo ennatthopoolla dda ororomelleya wanyu onipuroni na woonongeya?

¹² Ethiyo ddoottikhiniha ddanyu ddinnadduwanyeya mwiipiphini apaalle echilungamwaanyu mu ellapo ya ootiwalleya?

¹³ Koma kinninlla wi nyu Apwiya mukikavihere, nivekello naka ninnaphiya wa nyuwaano ohinase.

¹⁴ Nyu Apwiya kaambiiwa tini munakitathilleenyu? Kaambiiwa tini mukiipitthihelleenyu ekhove?

¹⁵ Voohoowani ni voohallani vakhuviru okhwa, waambeella enamwanaaka ophiyera wunnuwa, vawiireyani ddawoopiha ddanyu koorama nikavihero.

¹⁶ Osha murima wanyu wookimirya, ddawoopiha ddanyu ddookoononga.

¹⁷ Ddittheddenenndda ddinnakaapheella nllapo nittheene wonanko echigumula, ddookitiyellella wunchichi.

¹⁸ Mohaathawiha akhwaaka ni athu ookikonda akhwaaka tti epiphi.