Masalimo 86 - Mawu a Mulluku

Nivekello na nikavihero

Salimo na Davide.

¹ Nyu Apwiya, kaapelleni maaru, kaakhulleni, vawi miyaano kiri oohoowa ni oopaneya.

² Sungani okumaaka vawi kinnawiiwellellani nyuwaano. Nyu Mullukwaaka, mvulluseni oorumeyellaanyu awuuroromellani.

³ Nyu Apwiya, keerelleni echifundo, vawi kinninllella wa nyuwaano mallapo mattheene.

⁴ Hakallallihani murima wa oorumeyellaanyu, vawi kinnavelleella murimaaka wa nyu Apwiya.

⁵ Nyu Apwiya tti aphaama ni ookhululukella, echikondaanyu yoohisintheya tti yuullupalli wa attheene ayo enawiithanani.

⁶ Nyu Apwiya, apellani maaru ovekella waka, iwani winlla waka wooveka okaviheriwa.

⁷ Va nllapo na ddookatamiha kinnawiithanani, vawi munnaakhulla mavekellwaaka.

⁸ Nyu Apwiya, variyari va milluku, khaavo naari mmodda anaphwanaphwana ni nyuwaano, khaddiivo mitteko ddinaphwanaphwana ni mitteko ddanyu.

⁹ Nyu Apwiya, mitundu ddittheddene dda athu mwaddiphatusalleenyu ddineeroowa wa nyuwaano, ddineerewuukokhorellani, ddineerotitimiha ottekweenaanyu,

¹⁰ vawi nyuwaano tti muullupalli, munneera ddeko ddoottikhiniha, nyeeneve sika Mulluku.

¹¹ Nyu Apwiya, kihuddiheni ettilla ddanyu wi keeteke mu ddawoona ddanyu. Mukivahe murima woohikawaneya wi kooveke nnddina nanyu.

¹² Nyu Apwiya Mullukwaaka, kinnuuthokozani ni murimaaka muttheene, kineerotitimiha nnddina nanyu wa enthawi yoohimalla.

¹³ Vawi echikondaanyu yoohisintheya va miyaano tti yuullupalli nave mwahaakihera okumaaka o woowallamella wa ellapo ya ookhwa.

¹⁴ Nyu Mulluku, athu eepewe aakiwukila, athu eekuku ennaashaasha okumaaka, khenapwatha dda nyuwaano.

¹⁵ Koma nyu Apwiya, tti Mulluku eechifundo, Mulluku ooreera murima, oohaakuva osha murima, ooddalla ni echikondi yoohisintheya ni oororomelleya wunchichi.

¹⁶ Mukirukunuwelle nave mukeerelle echifundo, mukivahe masivaanyu mi oorumeyellaanyu, mukivulluse miyaano mwaana a kaporwaanyu aamutthiyana.

¹⁷ Mukoonihelle echizindikiro ya oreera murima wanyu wi awiitana ni miyaano ewulliwe muru, vawi nyuwaano, Apwiya mookikavihera, mookhurumusa murima.