Masalimo 85 - Mawu a Mulluku

Nivekello na murendelle va ellapo

Wa oohoollella wiipa. Salimo na edduullu dda Kora.

¹ Nyu Apwiya, mwaayeerella echifundo ellapwaanyu, mwaahokollosella ekari wa nibanja na Yakobo.

² Mwaakhululukella machimo a athwaanyu, mwaavuhellella ddoolakwa ddiwa ddittheddene.

³ Mwaahiya osha murima wanyu wawoopiha, mwaahiiha onanariwa wanyu wookhara munllo.

⁴ Nyu Mulluku oonivullusaahu, munihokolloselle mwakhalle, munivenyihelle osha murima wanyu.

⁵ Ethiyo muneeronishella murima wa enthawi yoohimalla? Ethiyo muneerovirellella onanariwa wa mibado ddahu ddittheddene?

⁶ Ethiyo khamunivahattho okumi wi hiyaano athwaanyu nihakallalle ni nyuwaano?

⁷ Noonihelleni echikondaanyu yoohisintheya, nyu Apwiya, nivaheni ovullusa.

⁸ Kiiwe nnddo Apwiya Mulluku enaallotiiwa vawi eneerollota dda murendelle wa athwiiwa, wa athwiiwa aweella murima yaahihokollweella o ddookarangeya ddiwa.

⁹ Ddawoona, Mulluku tti ookhozeka wi aavulluse ayo enamoova wi ntitimiho naye nikhalle mu ellapwaahu.

¹⁰ Echikondi yoohisintheya ni ororomelleya ddineerokumana, echilungamo ni murendelle ddineerokhupaarellana.

¹¹ Athu eneerokhalla oororomelleya vatthimva, echilungamo eneeroweha vatthi ovenyera oddullu.

¹² Ddawoona, Apwiya eneerovelleella ddaphaama, ellapwaahu eneerokhalla ni ddoohata ddinchichi.

¹³ Echilungamo eneerewaahoollella, eneeromookollella meetellwaaye.