Masalimo 84 - Mawu a Mulluku

Opaalla okhalla mu enyumba ya Mulluku

Wa oohoollella wiipa, voottakihani miipello a Gititi. Salimo na edduullu dda Kora.

¹ Nyu Apwiya Amasiva Mattheene, nipuro nno munakhalleenyumo, tti nookondiwa wunchichi.

² Murimaaka onnapaalla, ophiyera ongomowa opaallesesa woona nipuro na Apwiya. Nyu Mulluku Ookumi, kinnawiipellani moohakallalla ni murimaaka muttheene.

³ Naari kattiitti annaphwanya mapuro ookhalla, neenkhaare annamaka emphurwaaye mmo anaakonaatthiheeyemo asaanaaye, vakhuviru ni makuwaanyu, nyu Apwiya Amasiva Mattheene, Mwenaaka ni Mullukwaaka.

⁴ Oodala tti athu ayo enakhalla mpa mwanyu, eniipa machipo awuutitimihani enthawi ettheene.

⁵ Oodala tti athu ayo masiviiwa enavenyera wa nyuwaano, ayo m'murimani mwiwa enapaallesesa oweella m'misewuni ddooya o Ziyoni.

⁶ Yaallapuwaka ntapo na Baka noohikhalla ni maaddi, ennanitthattusa nipuro na aneetuutu, murimu a ntthokollapallaka annaniddalliha ni mathiya.

⁷ Masiviiwa ennavirellella waata, Mulluku a milluku awooneya mu Ziyoni.

⁸ Nyu Apwiya Mulluku Amasiva Mattheene, iwani nivekello naka, nyu Mulluku a Yakobo kireyeni naaru,

⁹ Nyu Mulluku, tti yawiitetezellaahu, wehani ekhove ya oozoziwaanyu.*

¹⁰ Okhalla nllapo nimodda mu nipuro nanyu tti waphaama wunchichi okhwaranya okhalla mallapo manchichi orive weko. Ddeerokiddivella okhalla va mullako wa enyumba ya Mullukwaaka okhwaranya okhalla mpa mwa athu oonanara.

¹¹ Vawi Apwiya Mulluku sika nndduwa ni yawiitetezella, ennaneerella echifundo ni onivaha olemu, Apwiya khenawiimana ddaphaama athu oolungama.

¹² Nyu Apwiya Amasiva Mattheene, oodala tti muthu awuuroromellani.