Masalimo 83 - Mawu a Mulluku

Nivekello na ogonjihiwa wa adani a Israele

Salimo na Asafu. Nchipo.

¹ Nyu Mulluku, muhimaalleye, muheere phee, muheere ellapo tuu nyu Mulluku.

² Ngoonani, adanaanyu enneera echiwawa, awiitana ni nyuwaano ennuuwukilani.

³ Ennaapanganella ddoonanara athwaanyu moochenjera, enniiwanana ddoonanara va ayo munaatetezeenyu.

⁴ Ennallota wi, “Hankoni nitthollose mutundwiiwa muttheene, nnddina na Israele nihuupuwelleyettho.”

⁵ Ddawoona, enniiwanana dda echiwembu, ennapangana dda wuuwukilani,

⁶ athu ookhalla m'misasani dda Aedomu ni Aishimaele, Amowabu ni Ahagara,

⁷ Agebala, Aamoni ni Aamaleke, Afilisti ni aneetthi a o Tiro.

⁸ Alliwattho Aasiriya ahiiwananana wi ellipihe masiva a edduullu dda Loti.

⁹ Muweere nnddo mwaweerenlleenyu Amidiyani, Sisera ni Yabini o muhinje wa Kishoni,

¹⁰ ayo yoonongiwe o Endori ni waatthattusa manyowa muthayani.

¹¹ Enduna ddiwa muddeerelle nnddo mwamwerenllenyu Orebu ni Zeebu. Anamwani a mamweniiwa mattheene, muweerelle nnddo mwamwerenllenyu Zeba ni Zalimuna.

¹² Yaallota wi, “Hankoni naakhe ellapo ya Mulluku wi ekhalle yaahu.”

¹³ Nyu Mullukwaaka, atthattuseni nthupi noovavihiwa, ekhalle wonanko mallulla oopallallesiwa ni ephevo.

¹⁴ Wonanko mmo munllo onashellellihiiwa otthako, wonanko mmo onakharelliiwa vamiyaangoni,

¹⁵ emoddamoddave yeeyo muwiikarihe ni ephevo yawoopiha, muwoopopihe ni namangallaanyu.

¹⁶ Nyu Apwiya mwaawullihe muru wi yaashaashe nnddina nanyu.

¹⁷ Ewulliwe muru nave yoopopiheye wa enthawi yoohimalla, ekhwe moovevuwesesa.

¹⁸ Edduwelle wi nyeeneve, nnddina nanyu tti Apwiya Amasiva Mattheene oolamulella ellapo yavatthi ettheene.