Masalimo 80 - Mawu a Mulluku

Nivekello nawi mutundu muttheene ohokollweelle mwakhalle

Wa oohoollella wiipa, voottakihani miipello a nchipo nawi Kakombo a Echipangano. Salimo na Asafu.

¹ Nyu mbusa a Israele, ngiiwani nyu oyo munaahoollella athu a Yosefe wonanko mulloko wa enkhosa, nyu oyo munakhalla va akerubi* wonanko mpandwaanyu woomwene,

² ddooniheni wa malloko a Efuremu, Benjamini ni Manase. Onihani masivaanyu, muwe wi mukivulluse.

³ Nyu Mulluku, nihokolloselleni mwakhalle niwalihelleni ekhovaanyu wi nivulluwe.

⁴ Nyu Apwiya Mulluku Amasiva Mattheene, munaananariwelle mavekello a athwaanyu ophiyera niini?

⁵ Mohaachiha miitthori wonanko yoocha, mohaawiryiha miitthori wonanko yoowirya.

⁶ Moonitthattusa ello yoovevuwa wa mitundu ddoonaapheella, adanaahu yakhalla vamodda ennanittheya.

⁷ Nyu Mulluku, nihokolloselleni mwakhalle niwalihelleni ekhovaanyu wi nivulluwe.

⁸ Mwaakhumiha mpesaanyu Israele mu ellapo ya Iguputo, mwahiikariha mitundu ddimodda dda athu wi mwaalle mpesooyo.

⁹ Mwaawullimella emata mpesooyo omella misisi ddoowallamella, oddalla mu ellapweeyo.

¹⁰ Miyaango ddaakhuneelliwa ni muuthuuchaaye, mikunguza dduullupalli ddaahuruwella ni enthambi ddiwa.

¹¹ Enthambinnddo ddaaphiya o Enyanja Yuullupalli enthambi ddimodda ddaaphiya o muhinje wa Yufurate.

¹² Vano kaambiiwa tini mukumullalleenyu mpandaaye wi oovira m'musewuni erukullekena ezipaso ddaye?

¹³ Ekulluwe ddamuutthakoni ddinnawoononga, enama ddamuhakani ddinnawucha.

¹⁴ Nyu Mulluku Amasiva Mattheene, nirukunuwelleni, niweheni ovenyera muddullu nave moone, pwathani mpesooyo,

¹⁵ muteekho oyo nyuwaano mwanlleenyu ni nnattanatta nanyu, oyo mwawunnuwihalleenyu moollipa.

¹⁶ Adanaanyu aawuhella munllo, aawuuha, aweheni alliwaayo moonanariwa wi yoonongeye.

¹⁷ Koma ni nnatta nanyu mwahaateteza athu ayo mwaatthoollilleenyu, athu ayo nyuwaano mwawunnuwihalleenyu ni waallipiha wi yuurumeyelleni.

¹⁸ Vano khanuuhiyanittho, nivaheni okumi wi nillapelle nnddina nanyu.

¹⁹ Nyu Apwiya Mulluku Amasiva Mattheene, nihokolloselleni mwakhalle niwalihelleni ekhovaanyu wi nivulluwe.