Masalimo 8 - Mawu a Mulluku

Otitimiheya wa Mulluku ni olemu wa athu

Wa oohoollella wiipa, voottakihani miipello a Gititi. Salimo na Davide.

¹ Mulluku, Apwiihu, nnddina nanyu tti noovuwa va ellapo yavatthi. Munnooniha ntitimiho nanyu oddullu.

² Munnaweeriha anamwani ni akantchewa wuutitimihani wi mumake mpanda woollipana ni adanaanyu, wi mwaakhurumuse ayo enuuwukilani.

³ Kaawehaka oddullu nko mwapangilleenyuwo, mweeri ni etheneeri mwaddiikaatthilleenyuwo

⁴ kinniikoha wi, “Muthu ttaani wi mumuupuwelleke? Muthu ttaani wi mumpwatheke?”

⁵ Koma moomuphatusa mooyeveella vang'ono ni Mulluku, moomuriiha ni omuvaha olemu woomwene.

⁶ Moomuvaha olamulello va mitteko dda mattaanyu, moohiya ddoophatusiwa ddittheddene vatthi va manyallwaaye

⁷ enkhosa, eng'ombe ni enama ddittheddene ddamuhakani,

⁸ epallame ddittheddene ddamuddullu ni ehomba dda mu enyanja ni ddimodda ddittheddene ddookhalla mu enyanja.

⁹ Mulluku, Apwiihu, nnddina nanyu tti noovuwa va ellapo yavatthi.