Masalimo 79 - Mawu a Mulluku

Nivekello na ovullusiwa wa mutundu muttheene

Salimo na Asafu.

¹ Nyu Mulluku, athu a mitundu ddimodda aavollweella mu yoohallanaanyu, aaripiha enyumbaanyu yaweella aamutthattusa Yerusalemu ntepe.

² Aatathilla mitembo dda oorumeyellaanyu wa epallame wi ddikhalle ddoocha ddiwa, miilli dda athwaanyu oororomelleya wa enama ddamuhakani.

³ Ahaakhumiha nikhame wonanko maaddi, omwaapheella Yerusalemu, khaarivo owaavittha malirwaayo.

⁴ Hiyaano nootthattuwa ello yoovevuwa wa athu a mitundu ddimodda, athu a mitundu ddoonaapheella ennaninyemulla ni onittheya.

⁵ Munaananariwe ophiyera niini, Nyu Apwiya, muneerosha murima wa enthawi yoohimalla? Ethiyo ehachaanyu eneerekokharave wonanko munllo?

⁶ Morihani owallaanyu va mitundu ddimodda nnddo ddihinuudduwellani, moomwene ayo ehinatitimiha nnddina nanyu,

⁷ Vawi ahaamirya athu a Yakobo, ellapwiiwa aayitthattusa ntepe.

⁸ Muhinanillaka ekaamba ya machimo a makhollwaahu, neerelleni echifundo mwawaakuva vawi nookitthihiwa wunchichi.

⁹ Nyu Mulluku oonivullusaahu, nikavihereni wi nnddina nanyu nititimiheye. Nivulluseni nave nikhululukelleni machimwaahu wi nnddina nanyu niriiheye.

¹⁰ Kaambiiwa tini athu a mitundu ddimodda enallotiiwa wi, “Ethiyo Mullukwiiwa ari wuuwi?” Mwaakhullelle wi niwooneni mwaawaahokollosellaka yoonanara, ekaamba yowaakhumiha nikhame oorumeyellaanyu.

¹¹ Mwiiwe wiipullella wa athu a mu endende, mwaateteze ni masivaanyu muullupalli oophwanella wiiphiwa.

¹² Nyu Apwiya, ovevulla wulle athu yuuvevunlliiwani mwaahokolloselle otthanu ni opiilli.

¹³ Vaavo hiyaano athwaanyu, enkhosa dda woochihella enama wanyu, nineerewuuthokozani wa enthawi yoohimalla, nineerollalleya dda ntitimiho nanyu wa mibado ddittheddene.