Masalimo 76 - Mawu a Mulluku

Mulluku oogonjiha

Wa oohoollella wiipa, voopharihani mutteko ezida dda enthambo. Salimo na Asafu.

¹ Mulluku tti oodduwanyeya mu Yuda, nnddina naye tti nuullupalli mu Israele.

² Enyumbaaye eri o Yerusalemu, nipuro naye niri o mwaango wa Ziyoni.

³ Wenko ahiinttakawo miira, ddawiitetezella, masupada ni ezida ddakhoto ddittheddene dda adanaaye.

⁴ Nyu Mulluku, munnooniha masivaanyu okhwaranya miyaango dda anamasikita.

⁵ Mwahaakha okhotoni ddeko dda oollipa murima, nave mwahaakoniha ekhove, akhoto attheene mattiiwa yaafooka.

⁶ Nyu Mulluku a Yakobo, mwaahumullullalleenyu attheene oowella va akavalo ni akavalwiiweene yaakhwa.

⁷ Ddawoona, nyuwaano tti awoopiha, ttaani anaawore wiimella vamiitthoni vanyu mwasha murima?

⁸ Ovenyera oddullu mwaallalleya echiweruzwaanyu, athu a va ellapo yavatthi yahoova, yaheera ellapo tuu,

⁹ nyu Mulluku, mwiimenlleenyu wi muweeruze athu ni waavullusa oonyingallelliwa attheene a va ellapo yavatthi.

¹⁰ Ddawoona, osha murima wa athu oneerewuuriihani, oovulluwa o osha murimanko muneerewaasunga vakhuviru ni nyuwaano.

¹¹ Llupellani wa Apwiya Mullukwaanyu, mweereke nnddo mullupenlleenyu. Attheene emwaaphenlle eweena emphaso wa oyo anaphwanella wooviwa,

¹² oyo anamalliha masiva a enduna oyo anawoopiha mamwene a va ellapo yavatthi.