Masalimo 74 - Mawu a Mulluku

Nivekello nawi mutundu muttheene ovullusiwe

Endakatulo ya Asafu.

¹ Nyu Mulluku, kaambiiwa tini munanikhooteenyu wa enthawi yoohimalla? Kaambiiwa tini onanariwa wanyu onoosiiwa enkhosa woochihella enama wanyu?

² Wuupuwelleni athwaanyu ayo mwaapatulalleenyu ovenyera khalle, mutundu oyo mwawooponlleenyu wi okhalle yoohallanaanyu. Upuwellani mwaango wa Ziyoni nko mwakhanllekeenyuwo.

³ Waawooni mweetelle matepe awoonongeyesesaalla, adani ahoononga ddeko ddittheddene dda mu enyumbaanyu.

⁴ Adanaanyu aathuruma munipuroni nanyu noopatuleya, yaahiyamo embendela ddiwa wooniha wi aagonjiha.

⁵ Yaaphaddamo ddittheddene wonanko mmo athu enaphaddelliiwa miteekho muutthakoni.

⁶ Vatulli viwa aakhaddulla ddoosemasema ddittheddene ni kottokwa owaaka hamala.

⁷ Enyumbaanyu yaayihella munllo, nipuro nno mwakhalleenyumo, yaaniripiha voonikumullani.

⁸ M'murimani mwiwa yallota wi, “Hankoni naagonjihe wa enthawi yoohimalla.” Yaahella munllo mapuro oopatuleya mattheene a Mulluku mwiillaponimmo.

⁹ Ezizindikiro ddahu ddittheddene ddohoonongeya, khaawo naari namallotella naari mmodda, khaavo naari mmodda variyari vahu oyo anadduwella enthawi ya omalla wa ddenndda.

¹⁰ Nyu Mulluku, ethiyo adanaayo enaawuunyemullekeni ophiyera niini? Ethiyo adanaayo evevulleke nnddina nanyu ophiyera wa enthawi yoohimalla?

¹¹ Kaambiiwa tini munahokolloseenyu nnatta nanyu noonikavihera? Nnatta nanyu ninakhallella tini vakhakaddani vanyu?

¹² Koma nyu Mulluku tti mwenaaka ni Mullukwaaka waambeella khallekhalle. Munnaphara mutteko woovullusa va ellapo yavatthi.

¹³ Mwaayikawa Enyanja Yoofiira ni masivaanyu, mwaanyenya miru dda enama ddawoopiha ddam'maaddini.

¹⁴ Mwaapwesa miru dda Leviyatani,* muyitathilla wi ekhalle yoocha ya enama ddawoopiha ddamuhakani.

¹⁵ Mwahaatuulla aneetuutu ni mihinje, mwahummiha mihinje dduullupalli.

¹⁶ Mwaaphatusa otthaana ni mahiiyu, mwaahiya nndduwa ni mweeri m'mapuroni mwiwa.

¹⁷ Mwaaphadda malire a ellapo yavatthi, mwaakeraatthiha ellimwe ni eyitta.

¹⁸ Nyu Apwiya upuwellani wi adanaanyu ennuunyemullani, wi athu eepewe ennavevulla nnddina nanyu.

¹⁹ Muhinavelleella okumi wa ekhundaanyu, Israele wa enama ddawoopiha. Muhinatiwalla okumi wa athwaanyu oohoowa wa enthawi yoohimalla.

²⁰ Upuwellani echipanganwaanyu, vawi mapuro awiipittheya mwiillaponi, aatthattuwa mooweerella ekuku ddinchichi.

²¹ Muhinaakhullella wi oonyingallelliwa ewulliwe muru, waakhullelleni ohoowa ni oopaneya yuutitimiheni.

²² Nyu Mulluku venyani, hankoni mwiiteteze vamullatuni vanyu. Upuwellani wi athu eepewe ennuunyemullani nllapo nittheene.

²³ Muhinatiwalla echiwawa ya adanaanyu, ovirellella wa ntapha na ayo enuuwukilani.