Masalimo 73 - Mawu a Mulluku

Nibukhu naneeraru Masalimo 73—89 Echilungamo ya Mulluku

Salimo na Asafu.

¹ Ddawoona, Mulluku tti aphaama wa Israele, wa athu aweella murima.

² Koma miyaano kahanlle vang'ono okwakwatuwa, manyallwaaka yahanlle vang'ono oserenguwa,

³ kaakhallelleemi ehache athu awiitukhulla kawoonilleemi athu oonanara eri ni eyuuma yinchichi.

⁴ Alliwa kheniiwa ovoreya naari vang'ono, miilli ddiwa tti ddooneneva nave ddoocha phaama.

⁵ Khenoona ddookatamiha wonanko athu amodda, khenahoowa wonanko akhwiiwa.

⁶ Ennawara wiitukhulla wonanko mukhova wa mukohi ennawara ekuku wonanko malaya.

⁷ Oneneva wohiipiha miitthwiiwa, mirima ddiwa tti ddooddalla ni maganizo oonanara.

⁸ Ennanyemulla ni ollota ddoonanara, enniitukhulla nave ennawoopopiha amodda wi eneerewaanyingallella.

⁹ Vayanoni viwa vinnallota ddoomunyaambusa Mulluku oddullu, nllumi niwa tti noohimakeya va ellapo yavatthi.

¹⁰ Sika naari athu a Mulluku ennawa wa alliwa, ennavona ddoollota ddiwa wonanko maaddi.

¹¹ Ennallota wi, “Ethiyo Mulluku anaadduwelle mwawiidde? Ethiyo Amasiva Mattheene ttuudduwella erive ello?”

¹² Ngoonani mmu sika enakhallella athu oonanara. Erive enthawi ennakhalla vaphaama nave ennakhalla ni eyuuma moohihiyerera.

¹³ Miyaano koosunga murimaaka waweella, koonawa wooniha wi miyaano tti oohilakwa koma ddittheddenennddo khaddinna mutteko.

¹⁴ Kinnakatamihiwa nllapo nittheene, kinnallakiwa orive ohinase.

¹⁵ Kallonteke wonanko alliwa, keerokhalla oohiroromelleya wa athwaanyu.

¹⁶ Koma kaddiganizereemi ddenndda wi kiddiiwesese phaama, ddahooneya wa miyaano wonanko ddookatamiha.

¹⁷ Ophiyera kivollowille nipuro aweella a Mulluku vaavo sika koonilleemi omalla wa athwaayo.

¹⁸ Ddawoona, munnaanyingalliha voottherenya oonanara, munnaakuha ophiyera ennoonongeya.

¹⁹ Eneerewoonongeya va enthawi yooyeva, eneeromalla moorurumusa.

²⁰ Nyu Apwiya, muneerewaavevulla wunchichi mwaavenyeka wonanko mmo muthu ananyemullelleeye ddoolloha avenya ohinase.

²¹ Vaavo murimaaka waakivoreya, kahoona yoohoma m'murimani mwaka.

²² Kaakarangeya oohiiwesesa wonanko enama

²³ Koma miyaano kiri ni nyuwaano enthawi ettheene, nyuwaano munnakiphara nnattanatta.

²⁴ Munnakookollella ni malangizwaanyu, vatulli viwa muneerokaakhella mu ntitimiho nanyu.

²⁵ Ethiyo kiri ni aani oddullu mwaahikhalla nyuwaano? Vatthimva kheviri erive ello eyo kinayipaalleemi koma nyeeneve.

²⁶ Naari mwiillaaka ni murimaaka ddifookille mwawiidde, Mulluku sika masiva a murimaaka, sika yoohallanaaka wa enthawi yoohimalla.

²⁷ Attheene ayo eri wuuteete ni nyuwaano eneerewoonongeya, oohuuroromellani muneerowoononga.

²⁸ Koma okhalla vakhuviru ni Mulluku onnakiddivella, koosimikiza wi Apwiya Mulluku sika woothawella waka, kineerollalleya mitteko ddiwa ddittheddene.