Masalimo 72 - Mawu a Mulluku

Omuvekellella mwene

Salimo na Solomoni.

¹ Nyu Mulluku, muvaheni mwene echiweruzwaanyu yoolungama, mwaana a mwene echilungamwaanyu.

² Vano mwenooyo aneeroweeruza athwaanyu moolungama, athwaanyu oohoowa moohiweha ekhove.

³ Miyaango ddineerokusella madaliso wa athu, asimiyaango eneerowaana echilungamo.

⁴ Mwene aneerewaateteza oohoowa, aneerewaavullusa oopaneya, koma aneerowoononga awaahoosa akhwiiwa.

⁵ Athu eneerewuullapellani wa mibado ddittheddene, erive enthawi nndduwa naawoopaka ni mweeri waawalaka muddullu.

⁶ Aneerokhalla wonanko murimu oorupella m'matani, enyeenye yoorupella ethaya.

⁷ Va mallapwaaye echilungamo eneerewunnuwa, murendelle oneerewaata ophiyera mweeri ohiyalle owala.

⁸ Aneerekolamulella ovenyera o enyanja emodda ophiya o enyanja emodda, ovenyerattho o muhinje ophiya o makomello wa ellapo yavatthi.

⁹ Athu a muchipululuni eneeromuwaramella, adanaaye eneeromukokhorella vanthupini.

¹⁰ Mamwene a o Tarishishi ni a o ezilumba eneerowaana mituka navettho mamwene o Sheba ni o Seba eneerowaana emphaso.

¹¹ Mamwene mattheene eneeromukokhorella, mitundu ddittheddene dda athu ddineeromurumeyella.

¹² Olliye aneerewaavullusa oopaneya ayo enamwiithana, oohoowa oorama owaakavihera.

¹³ Aneerewaamorella ethakaraka athu oofooka ni oohoowa, aneerovullusa okumi wa oopaneya.

¹⁴ Aneerewoopolla okumiiwa wa owaanyingallella ni eechiwawa nikhame niwa tti noowallamella mutengo vamiitthoni vaye.

¹⁵ Akhalle ni okumi wawaata! Golide o Sheba avahiwe wa olliye. Athu emuvekellelleke enthawi ettheene, emuvekellelleke moohihiyerera madaliso oohimalla.

¹⁶ Mu ellapo mukhalle yoocha yinchichi, vaddullu va mwaango vikhallettho ddeko. Ezipaso ddaye ddikhalle ddinchichi wonanko dda o Lebanoni. Athwaaye yaate m'mizindanimmo wonanko manasi amuhakani.

¹⁷ Nnddina naye nihitiwalliwe naari vang'ono, epillaaye ekhallevove wonanko nndduwa. Athu yaakhelle madaliso ekaamba ya olliye, mitundu dda athu ddittheddene ddimweere oodala.

¹⁸ Etitimiheye Apwiya Mulluku a Israele, ayo aneera ddeko ddoottikhiniha.

¹⁹ Nnddina niwa nootitimiheya nidaliseye wa enthawi yoohimalla, otitimiheya wiwa oddalle ellapo yavatthi ettheene. Amen! Amen!

²⁰ Omalliha wa mavekello a Davide mwaana a Yese.