Masalimo 71 - Mawu a Mulluku

Nivekello na muthu awuulluvalla

¹ Apwiya kinathawella wa nyuwaano, muhikiwullihe muru.

² Kaakihereni nave kivulluseni kaambiiwa nyu tti oolungama. Kaapelleni maaru wi mukiiwe nave mukivulluse.

³ Mukhalle nlluku naka noothawellawo, mpandaaka woollipa wookivullusa. Ddawoona, nyuwaano sika nlluku naka ni mpandaaka.

⁴ Nyu Mullukwaaka kaakihereni wa athu oonanara, o masiva a athu oohilugama ni eekuku

⁵ Nyu Apwiya Mulluku, tti oyo kinamutiyerelleemi, oyo kinamuroromelleemi waambeella enamwanaaka.

⁶ Mookiseera, waambeella eyariwellwaaka, mwaakikhumiha m'murimani mwa amoowaaka, kinnuutitimihani nyuwaano erive enthawi.

⁷ Kiri ello yoottikhiniha wa athu anchichi vawi nyuwaano tti voothawella vaka voollipa.

⁸ Vayanoni vaka vinnuutitimihani, voollalleyani oriiheya wanyu nllapo nittheene.

⁹ Muhikitathille enthawi ya wuulluvalla waka, muhikihiye meekha masivaaka yamalla.

¹⁰ Adanaaka ennallota dda miyaano, ookithwara manyallo ennakipanganella.

¹¹ Enallota wi, “Mulluku oomuhiya, muthwareni manyallo mumuphare, vawi khaavo naari mmodda anaamuvulluse.”

¹² Nyu Mulluku, muhikirekamelle, nyu Mullukwaaka, akuvani okikavihera.

¹³ Athu ookivaanyiha ewulliwe muru nave yoonongeye, oowaashaasha ookivoreya evevulliwe, ewulliwesese muru.

¹⁴ Koma kineerekewuutiyerellani erive enthawi, kineerovirellella wuutitimihani.

¹⁵ Vayanoni vaka vineerollota ddoolungama ddanyu ni dda ovullusa wanyu nllapo nittheene, vawi nginadduwella waata wene.

¹⁶ Kineeroowa ni othenga wootthopoolla dda mitteko ddamasiva dda Apwiya Mulluku. Kineerotitimiha echilungamwaanyuve.

¹⁷ Nyu Mulluku, mookihuddiha waambeella enamwanaaka, ophiyera ollello kinnallalleya mitteko ddanyu ddoottikhiniha.

¹⁸ Nyu Mulluku, muhikihiye meekha, naari kuulluvanlle, kiri ni embwi ophiyera killalleyille dda masivaanyu ni dda ekophollo ddanyu wa mibado ddamuhoollo.

¹⁹ Echilungamwaanyu ennaphiya oddullu, nyu Mulluku, moheera dduullupalli, ttaani anaaphwanaphwane ni nyuwaano

²⁰ Nyu mwanoonihalle ddookatamiha ddoovoreya muneeronivenyiha, muneerokikhumihattho mu nlliti noowallamella na vatthi va ellapo.

²¹ Muneerewoonjerera olemwaaka, muneerokikhurumusattho murima.

²² Nyu Mullukwaaka, kineerewuutitimihani ni zeze ekaamba ya ororomelleya wanyu. Nyu Aweella a Israele, kineerewiipa machipo awuuriihani ni ezida dda enthambo.

²³ Vayanoni vaka vineerokhuwa ni ehakallallo voowiipellani machipo awuutitimihani. Murimaaka muwooponlleenyu, oneerewiipa mowuuriihani.

²⁴ Nllapo nittheene kineerollalleya ollota dda echilungamwaanyu wi oowaashaasha okivoreya, evevulliwe, ewulliwesese muru.