Masalimo 7 - Mawu a Mulluku

Nivekello na echiweruzo yoolungama

Salimo na Davide, awiipelleeye Apwiya ekaamba ya Kushi Mubenjamini.

¹ Wa nyu Apwiya, Mullukwaaka, kinnathawellawo. Mukaakihere wa attheene enakiikariha kivulluseni miyaano!

² Ehikitthalle wonanko mukango, ehikikhaddulle vihiri ookivullusa.

³ Apwiya Mullukwaaka, kaarimi kenre ddenndda kimuchimwenlle arive muthu,

⁴ kaahokolloselle ddoonanara akhwaaka kimwaakhille ddeko mudanaaka vihiri ekaamba,

⁵ mudanooyo akiikarihe ophiyera akipharille, akinyingalle ophiyera akiiphalle, akihiye kiri kwalaa, mathayana.

⁶ Apwiya venyani moosha murima, mullipane ni adanaaka oowalli. Tthupulluwani nyu Mullukwaaka, lamulani wi echilungamo yeereye.

⁷ Mutthukumanihe mitundu ddittheddene moowaapheellani, muweeruze mukeraatthille vampandonaanyu oddullu.

⁸ Apwiya munnaweeruza athu attheene, kamullani mullatu moollikana ni echilungamwaaka, vawi miyaano tti oohilakwa.

⁹ Pepaani, mallihani ddoonanara dda oochimwa, koma aphaama mwaakeraattheyihe. Munnadduwella maganizo ni mirima ddene, nyu tti Mulluku oolungama.

¹⁰ Mulluku sika echishangwaaka, annaavullusa athu oolungama.

¹¹ Mulluku sika aweeruza oolungama, nllapo ni nllapo annaallaka oonanara.

¹² Muthu aahirukunuwa murima, Mulluku aneerewaandusa nsupada naye, aneerokunga ni owettha muuraaye.

¹³ Aneeroddikhoza ezida ddaye ddawoopiha, aneerokusa mipaamba ddamunllo omuurani waye.

¹⁴ Ddawoona, athu oonanara, ennakusa erukullu ya ddoonanara, ennarupalla makhallello oonanara, ennayara mitteko ddoolleka.

¹⁵ Ennakata nlliti noowallamella koma eneeromorellamo weekhiiwa.

¹⁶ Sika ddoonanara ddiwa ddinnaarukunuwella, ekukwiiwa ennaahokollweella aneeniiwa.

¹⁷ Miyaano kineeromuthokoza Mulluku Amasiva Mattheene, ekaamba ya echilungamwaaye. Kineerewiipa machipo owaatitimiha Apwiya, Amasiva Mattheene.