Masalimo 69 - Mawu a Mulluku

Winllella nikavihero

Wa oohoollella wiipa, voottakihani miipello a nchipo nawi Akakombo. Salimo na Davide.

¹ Nyu Mulluku, kivulluseni vawi maaddi aaphiya munikohini.

² Kootora m'matokwini oowallamella mmo muhiri ddoonyingalla ddoollipa. Koovollowa m'maaddini oowallamella, mafunde aakimirya.

³ Koofooka ni winlla waka, ommilloni waka wohumma, m'mwiitthoni mwaka mookhalla epiphi kinamutiyerelleemi Mullukwaaka.

⁴ Athu ookiita voohikhalla ekaamba tti awaata okhwaranya meehi a m'muruni mwaka. Athu oopaalla okoononga tti amasiva, okinanariha ni ddawoottha ddiwa. Ethiyo kihokollose nnddo kihiiyalleemi?

⁵ Nyu Mulluku, munnadduwella okarangeya waka, ddoolakwa ddaka kheddiipittheya vamiitthoni vanyu.

⁶ Nyu Apwiya Mulluku Amasiva Mattheene, muhaakhullelle wi awuutiyerellani ewulliwe muru ekaamba ya miyaano, Nyu Mulluku a Israele, muhaakhullelle wi oowaashaashani evevulliwe ekaamba ya miyaano.

⁷ Vawi koovevulliwa, ekhovaaka yoowulliwa muru ekaamba ya nyuwaano.

⁸ Wa abalaaka kootthattuwa mulleto wa ookhumana erukullu emodda kootthattuwa m'maralla.

⁹ Echikondaaka va enyumbaanyu yookoononga, epewe ya athu awuuvevullani yookimorella.

¹⁰ Kiiyeviheemi voohallani ocha, athu yaakivevulla.

¹¹ Kawanreemi echiguduli wooniha winlla, kaatthattuwa yowaattheyiha.

¹² Athu ookhalla va mullako wa muzinda yaanakillota, oolezela yaanakiipa nchipo.

¹³ Koma miyaano kinnavekella wa nyu Apwiya, nyu Mullukwaaka, mukaakhulle mu enthawi yaphaama ekaamba ya wunnuwa wa echikondaanyu yoohisintheya ekaamba ya ororomelleya wa ovullusa wanyu.

¹⁴ Kivulluseni wi kihitore m'matokwini, kaakiheni wa adanaaka ni o maaddi oowallamella.

¹⁵ Muhaakhullelle wi maaddi oosefukella ekikuse wi enyanja yoowallamella ekimirye wi mahame ewalle owanoni wiwa ekimiryalle.

¹⁶ Nyu Apwiya, kaakhulleni vawi echikondaanyu yoohisintheya tti yaphaama, Kaapelleni maaru vawi echifundwaanyu tti yuullupalli.

¹⁷ Muhikiipitthihelle ekhovaanyu mi oorumeyellaanyu, akuvani okikavihera vawi kiri mu ddookatamiha.

¹⁸ Kaatamelleni mukoopolle, kivulluseni wa adanaaka.

¹⁹ Munnadduwella mmo athu enakivevullelliiwa, mmo enakiwullihelliiwa muru ni okivenyihella olemu, munnaadduwella adanaaka attheene.

²⁰ Murimaaka onnakivoreya ekaamba ya epewiiwa, kootathilla murima wunchichi. Kaawaashaasha amodda ookeerella echifundo koma khaarivo naari mmodda. Kaawaashaashattho amodda ookikhurumusa murima koma ngaamuphwanyille naari mmodda.

²¹ Yaakihellella nttipwi mu yoochaaka, yaakiwiryiha vinyo oonyuunya kaariimi ni nthona.

²² Machellellwiiwa ekhalle musampha wowaaphara, ekoliwe ni ehakallallo ya mikutho ddiwa.

²³ Miitthwiiwa ewe epiphi wi ehiwore woona eyuuni ddiwa dditthukumelleke.

²⁴ Muwiithellelle osha murima wanyu, owallaanyu waamorelle wonanko munllo.

²⁵ Mookhalla mwiwa mutthattuwe mutepe, m'misasani mwiwa muhihalle naari mmodda.

²⁶ Ennamuhoosa oyo mwamullakilleenyu, ennallota ayo mwaaphoriihalleenyu.

²⁷ Mwaallake va erive yoolakwiiwa, muhikamulle wi alliwa khenna mullatu.

²⁸ Mwaavenyihemo mu nibukhu na akumi, ehilembiwe nimodda ni athwaanyu.

²⁹ Koma miyaano koohooseya nave kinniiwa ovoreya, nyu Mulluku, kitukhulleni wi kivulluwe.

³⁰ Kineerotitimiha nnddina na Mulluku voomwiipellani nchipo, kineerollalleya ottekweenaaye voomuthokozani.

³¹ Ddenndda ddineeromuhakallalliha okhwaranya mukutho wa eng'ombe, nankhoro a eng'ombe a manyaka ni manyallo.

³² Oohoosiwa yiiwe nave ehakallalle, nyu munamwaashaasha Mulluku, mullipettho murima.

³³ Valle Apwiya ennawiiwa athu oohoowa, khenaavevulla athwiiwa oomakiwa ni onyolo.

³⁴ Oddullu ni ellapo yavatthi, enyanja ni ddittheddene ddiri mwemmo ddaatitimihe alliwa.

³⁵ Mulluku aneeromuvullusa Ziyoni, aneeromakattho mizinda dda Yuda. Athwaaye eneerokhalla wenko, enaakhalle ellapwiiwa.

³⁶ Edduullu dda oorumeyellaaye ddineeroyaakhellattho, oomukonda eneerokhalla mwemmo.