Masalimo 68 - Mawu a Mulluku

Nchipo noohakallallella ogonjiha

Wa oohoollella wiipa. Salimo na Davide. Nchipo.

¹ Mulluku avenya adanaaye ennapallalleya, attheene enamwiita emmathawa vamiitthoni vaye.

² Ennapallalleya wonanko mmo oneerella mwiisi, ennoonongeya vamiitthoni va Mulluku, wonanko mmo nimphora ninattotthowelliiwa vamunlloni.

³ Koma nyu Mulluku athwaanyu ennahakallalla, ennathapella vamiitthoni vanyu, ddawoona, ennattheya moohakallalla.

⁴ Mwiipelleni Mulluku, machipo ootitimiha nnddina naye. Mwiipelleni nchipo noomutitimiha oyo anawella vamiraponi. Nnddina naye tti Apwiya, muhakallalle vamiitthoni viwa.

⁵ Attiitthiiwa a akhwaadduni, aweeruza aphaama a anaamukhwelle, tti Mulluku oyo anakhalla onipuroni naaye naweella.

⁶ Mulluku annaavaha mapuro athu oohalla weekhiiwa ekhallekemo, a mundende annaakhumiha wi ekhalle oottaphulliwa koma oowukila annawiikarella o ethaya yooguga.

⁷ Nyu Mulluku, mwaahoollelleenyu athwaanyu yeetiiwa muchipululuni,

⁸ ellapo yaatikheya, muddullu mwaamurupiha murimu ekaamba ya owa wa nyu Mulluku. Mwaango wa Sinai waatikheya, ekaamba ya owa wa nyu Mulluku, Mulluku a Aisraele.

⁹ Nyu Mulluku, mwaamurupiha murimu, mwaallipiha ellapwaanyu mvo yafookilliiwa.

¹⁰ Athwaanyu yaaphwanyamo mapuro ookhallamo, nyu Mulluku, Moollikana ni oreera murima wanyu, mwahaavaha athu oohoowa ddoopaalla ddiwa.

¹¹ Apwiya yaavaha mawu, atthiyana anchichi enawa ni othenga wawi,

¹² “Mamwene a milloko dda akhoto enimathawa, ddawoona enimathawa, vano atthiyana oohalla vaatte ennakawana ddawaakha okhotoni.

¹³ Ddawaakha okhotoni ddooneya wonanko muuphello a ekhunda oohuruwelliwa ni siliva, enthenga ddiwa tti ddoohuriwelliwa ni golide oowala.”

¹⁴ Mvo Amasiva Mattheene aapallallesilleeye mamwene, o Zalimoni waamora nakhuttu awoopiha.

¹⁵ We mwaango wa Bashani, mwaango wa masiva, we mwaango wa Bashani, mwaango wa etthoka ddinchichi.

¹⁶ We mwaango wa etthoka ddinchichi, kaambiiwa tini onaweheewe mwa ehache mwaango oyo Mulluku awutthoonlleeye wi akhallekemo? Ddawoona, Apwiya eneerokhallamo wa enthawi yoohimalla.

¹⁷ Apwiya yaaphiya onipuroni niwa naweella ovenyera o Sinai, yaakhalla ni magareta manchichi amasiva.

¹⁸ Nyuwaano mwaawella oddullu, mwahaaphara athu anchichi monga amundende, mwahaakhella emphaso wa athu, naari wa athu oowukila, wi mwakhallekena wenko, nyu Apwiya Mulluku.

¹⁹ Etitimiheye Apwiya Mulluku oovullusaahu, oyo anamutukhulla katundwaahu nllapo ni nllapo.

²⁰ Mullukwaahu tti Mulluku oovullusa, tti Mulluku, Apwiya ayo enanoopolla wuukhwaani.

²¹ Koma Mulluku aneeropwesa miru dda adanaaye, miru dda athu attheene aweeta mu machimwiiwa.

²² Apwiya yaallota wi, “Kineerewaahokollosa adanaanyu ovenyera o Bashani, ovenyera o enyanja yoowallamella

²³ wi muruweye manyallwaanyu munikhameni, anapwaanyu ellanddewo nikhame na adanaayo.”

²⁴ Nyu Mulluku, mulloko wa athwaanyu waweeta moolemu onnooneya, mulloko woomutitimiha Mullukwaaka, mwenaaka, woovollowa mu nipuro noopatuleya.

²⁵ Oowiipa machipo eri vahoollo, oowiipa ni ezipangizo eri mutulli, anamwalli awiipa asikoma eri variyari.

²⁶ “Mutitimiheni Mulluku m'mutthukumano muullupalli, atitimiheni Apwiya nyu edduullu dda Israele.”

²⁷ Muhoollo mwiwa muri Benjamini, mung'onong'ono a attheenaayo, mutulli mwiwa munawa anamwani enduna dda Yuda owaaka enduna dda mamwene a Zebuloni ni a Nafutali.

²⁸ Nyu Mulluku, oyo ananeerella dda masiva, onihani masivaanyu

²⁹ ovenyera o enyumbaanyu ya o Yerusalemu, nko mamwene ennawiiwa ni emphaso wa nyuwaano.

³⁰ Humullullani enama yawoopiha yookhalla mu epango, enduna ni athwiiwa, ayo enakhalla wonanko mulloko wa anankhoro a eng'ombe owaaka asaanaang'ombe. Anyingallelleni ayo enapaalla makobiri moonanara apallalleseni athu ookonda ekhoto.

³¹ Mamwene eneeroowa ovenyera o Iguputo, a o Kushi eneerewaakuva omugonjella Mulluku, voowellihani mattiiwa wa olliye.

³² Mwiipelleni Mulluku nchipo, nyu mamwene a va ellapo yavatthi, ipani machipo owaatitimiha Apwiya.

³³ Apwiya ayo enawella m'miraponi, muddullu mwakhallekhalle iwani mawiiwa amasiva manchichi.

³⁴ Akhullellani wi Mulluku tti amasiva, olamulellwaaye ori va israele, masivaaya eri muddullu.

³⁵ Mulluku tti awoopiha mu nipuro naye noopatuleya. Mulluku a o Israele sika anavaha masiva ni waallipiha mwiilli athwaaye. Mulluku atitimiheye!