Masalimo 66 - Mawu a Mulluku

Salimo nootitimiha ni noothokoza

Wa oohoollella wiipa. Nchipo. Salimo.

¹ Nyu athu attheene a va ellapo yavatthi, mutitimiheni Mulluku moowelliha mawu,

² mwiipelleni machipo ootitimiha nnddina naye, mumutitimihe moolemu.

³ Mulleelleni Mulluku wi, mitteko ddanyu tti ddoottikhiniha. Masivaanyu tti muullupalli, adanaanyu ennawaramella vatthi moowoovani.

⁴ Athu attheene a va ellapo yavatthi ennuullapellani, enniipa machipo awuutitimihani, enniipa machipo ootetheella nnddina nanyu.

⁵ Waawoni moone nnddo Mulluku eerilleeye, mitteko ddaye ddoottikhiniha variyari va athu.

⁶ Aatthattusa enyanja wi ekhalle yawumma navettho Athu yaallapuwa muhinje yeetaka vatthi, sika ekaambiiwa nahakallanlleehuna olliye.

⁷ Annalamulella ni masivaaye wa enthawi yoohimalla, miitthwaaye ennoona mitundu dda athu, athu oowukila ehiitukhulle.

⁸ Nyu mitundu dda athu, mutitimiheni Mullukwaahu, mawu oomutitimiha olliye yiiweye.

⁹ Olliye oosunga okumaahu, khaakhullenlle wi manyallwaahu eserenguwe.

¹⁰ Nyu Mulluku, mooneesa, mooneelliha wonanko siliva aweekiwa phaama.

¹¹ Nyuwaano mwaanikoliha munikwekweni na adani, mwaanireya katundu awaata vamutthanani vahu.

¹² Mwahaakhullella wi adani eninyingallelle, naavollowa m'munlloni ni m'maaddini komave mooniphiyiha onipuroni nawiithuuwella.

¹³ Kineeroowa onyumbani wanyu ni mukutho wooshellelliha, kineereweera nnddo kallupenlleemi wa nyuwaano,

¹⁴ nnddo kallotilleemi ni eyanwaaka, nnddo kalonjezilleemi kiri mu ddookatamiha.

¹⁵ Kineerovelleella mikutho ddooshellelliha dda enama ddooneneva, mwiisi wa mukutho wa anankhoro a enkhosa oneerophiya wa nyuwaano, kineerovelleella mikutho dda anankhoro a eng'ombe ni a epuri.

¹⁶ Nyu attheene oomullapella Mulluku, waawoni mwiiwe, kuutthopoollelleni nnddo akeerelleeye.

¹⁷ Kahiithana wa olliye, kaamutitimiha ni eyanwaaka.

¹⁸ Kadduwenlleke yoonanara m'murimani mwaka nave kiyivittha, Apwiya kheyaakiiwellelle.

¹⁹ Koma Mulluku ookiiwa, oopwatha mawu a nivekello naka.

²⁰ Mulluku atitimiheye vawi khaakhootille nivekello naka, khavenyihalle wa miyaano echikondaaye yoohisintheya.