Masalimo 65 - Mawu a Mulluku

Otitimiha ni othokoza

Wa oohoollella wiipa. Salimo na Davide. Nchipo.

¹ Nyu Mulluku, athu eneerekewuutitimihani o Ziyoni, ddawoona, eneereweera nnddo yallupenlliiwa wa nyuwaano.

² Nyu oyo munaapella maaru mavekello, athu attheene eneeroowa wa nyuwaano

³ ekaamba ya machimwiiwa. Ddoochimwa ddahu ddanikhwaranya, nyuwaano munnaddikhululukella.

⁴ Oodalisiwa tti muthu oyo mwamutthoonlleenyu oyo munamweeriheenyu wi akhalleke m'mathatonaanyu. Munivonihe ni ddeko ddaphaama dda mu enyumbaanyu, enyumbaanyu yaweella.

⁵ Nyu Mulluku, oonivullusaahu, munnanaakhulla voonivullusani ni mitteko ddanyu ddoottikhiniha. Athu a va ellapo yavatthi ettheene vakhopella va enyanja ya woorekamella attheenaayo ennuuroromellani.

⁶ Nyuwaano mwahooniha masivaanyu, vookeraatthihani miyaango, voowaapheelliwani ni ekophollo.

⁷ Munnamaalliha onyakulla wa enyanja ni orindimuwa wa mafunde ni othiya owaruni wa mitundu dda athu.

⁸ Sika ookhalla omamallihello wa ellapo yavatthi, ennoova ezizindikiro ddanyu ddoottikhiniha. Athu ennakhuwa moohakallalla ekaamba ya ddaweera ddanyu, waambeella embali emodda ya ellapo yavatthi ophiyera embali emodda.

⁹ Vano munnayidalisa ellapo yavatthi ni oyihellella, munnayivaha eyuuma yinchichi. Muhinje wa Mulluku tti wooddalla ni maaddi, nyuwaano munnayivaha ddoohata, vawi tti mmo munapotokoselleenyu ddeko.

¹⁰ Munnahellella wunchichi mizere, munnaddivoniha ni maaddi, munnoollowiha ethaya ni murimu, munnadalisa mmiddo.

¹¹ Vamuyakhani munnavelleella ddoohata ddinchichi moollikana ni oreera murima wanyu, Orive weko munayeenyuwo, onnaphwanyeya ddeko ddinchichi.

¹² Naari mapuro oochiha enama a muchipululuni, onnamella munyepu munchichi, miyaango ddinnaddallihiwa ni ohakallalla.

¹³ Matapo aaddalla ni eziweto ni ddoohata, ddittheddene ddinnakhuwa ni wiipa moohakallalla.