Masalimo 64 - Mawu a Mulluku

Nivekello na echitetezo

Wa oohoollella wiipa. Salimo na Davide.

¹ Nyu Mulluku, iwani mawaaka kaawuukhupanyellakani, tetezani okumaaka wa mudani awoopiha.

² Kiipitthiheni o ddoopangana dda athu oonanara, echiwawa ya aweera oonanara.

³ Alliwa ennaandusa nllumi niwa wonanko nsupada, ennavokha mawu oohoma wonanko mipaamba.

⁴ Ennaavokhella mwawiipittheya athu oohilakwa, enaahoma moorurumusa ni moohoova.

⁵ Ennallipihella dda echiwembwiiwa, ennakambirana ddawi ereye misampha ddawiipittheya, ennallota wi, “Anaanoone ttaani?”

⁶ Ennaganiza ddoonanara enallota wi, “Noopanga moochenjera echiwembwaahu.” Ddooganiza ni ddoopaalla murima wa muthu tti ddoowallamella.

⁷ Koma Mulluku aneerewaavokha mipaamba, aneerewaahoma moorurumusa.

⁸ Aneerowoononga ekaamba ya ddoollota ddiwa, attheene oowoona eneerotikha muru.

⁹ Sika athu attheene eneerewoova, eneerollota dda mitteko dda Mulluku, eneeroganizella nnddo eerilleeye.

¹⁰ Oolungama ahakallalle mwa Apwiya, athawelle mwa alliwa, ooreera murima aatitimihe.