Masalimo 63 - Mawu a Mulluku

Omupaalla Mulluku

Salimo na Davide, mvo aariiye mu echipululu ya Yuda.

¹ Nyu Mulluku, nyuwaano tti Mullukwaaka, kinnawaashaashani, murimaaka wookhalla ni nthona noopaalla owoonani, mwiillaaka onnuupaallani wonanko ellapo yawumma, yooguga ni yoohikhalla ni maaddi.

² Vawi kinnapaalla woona masivaanyu ni ntitimiho nanyu wonanko mmo koonelleemi nipuro nanyu naweella.

³ Echikondaanyu yoohisintheya tti yaphaama okhwaranya okumi, sika kineerewuutitimihani ni vayanoni vaka.

⁴ Kineerewuutitimihani mallapo mattheene a okumaaka, kineerotukhullella mattaaka wa nyuwaano moovekella.

⁵ Muneerokivoniha ni ddoonuna, kineerewuutitimihani ni mawu oohakallalla.

⁶ Kakonaatthi vabedini vaka kinaganiza dda nyuwaano, mahiiyu mattheene kinuupuwella aganizera dda nyuwaano.

⁷ Nyuwaano mookhalla nikavihero naka, sika kiniipa moohakallalla vatthi va muuphellwaanyu.

⁸ Murimaaka woowaangellellani nyuwaano, nnattanatta nanyu ninnakiseera.

⁹ Koma athu ayo enaashaasha okumaaka eneerokitthella o nlliti noowallamella vatthi va ellapo yavatthi.

¹⁰ Alliwa eneerovelleelliwa wi yiiphiwe okhotoni, sika eneerotthattusiwa yoocha ya akhatwe.

¹¹ Koma mwene aneerohakallalla mwa Mulluku, attheene oomullupella olliye eneeromutitimiha, koma vayanoni va athu awoottha vineerowalliwa.