Masalimo 62 - Mawu a Mulluku

Ororomella echitetezo ya Mulluku

Wa oohoollella wiipa, moollikana ni miipello a Yedutuni. Salimo na Davide.

¹ Murimaaka onnamaalleya omutiyera Mullukuve, ovullusiwa waka onavenyera wa olliye.

² Olliye yeekhaayeve sika nlluku naka, oovullusaaka ni woothawella waka, ngiwa kitikheya naari vang'ono.

³ Ethiyo attheenenyu munaamullike muthu ophiyera niini wi mumukuhe wonanko esiri yootthettemana, wonanko mpanda waweengereya?

⁴ Yoopaalliiwa tti yawi emukitthihe vamapuronaaye oolemu. Ennakonda ollota ddawoottha, ennadalisa ni muwano mwiwa koma m'murimani mwiwa ennatembelela.

⁵ Murimaaka onnamaalleya omutiyerella Mullukuve. Ovullusiwa waka onavenyera wa olliye.

⁶ Olliye yeekhaayeve sika nlluku naka, oovullusaaka ni woothawella waka, ngiwa kitikheya naari vang'ono.

⁷ Ovullusiwa ni oriihiwa waka ddiri wa Mulluku, nlluku naka namasiva, woothawella waka.

⁸ Nyu athu, hiyani murimaanyu va olliye enthawi ettheene, mumulleelle ddittheddene dda m'murimani mwanyu. Mulluku sika woothawella wahu.

⁹ Athu shisha tti mpweyave athu ootukhuwa tti awoottha, attheenaayo tti oohillemella vasikeloni ni oveveluwa okhwaranya mpweya.

¹⁰ Muhiroromelleke dda echiwawa wi ddineerewuukaviherani, muhiganize wi wiiya muneerophurana ello, eyuuma yaata muhinahiyavo murima.

¹¹ Mulluku allotille omodda miyaano kiiwalle ddeko piilli ddawi, masiva tti a Mulluku.

¹² Navettho nyu Apwiya, echikondaanyu tti yoohisintheya, nyuwaano munnamuhokollosella muthu moollikana ni mitteko ddaye.