Masalimo 60 - Mawu a Mulluku

Ovekella ovullusiwa

Wa oohoollella wiipa, voottakihani miipello a nchipo nawi Kakombo a Echipangano. Salimo na Davide na mutundu wa Mikitamu, noohuddihella. Enthawi yeeyo Davide aari awanne ni athu a o Aramu Naharimu ni a o Aramu Zoba nave Yowabu aari awoonongille Aedomu 12,000 o ntapo na Mwiinyu.

¹ Nyu Mulluku moonitathilla, moonoonongella ooniteteza, moonillutuwella, nihokolloselleni mwakhalle.

² Mootikha ellapo, mooyitthalla, potokosani mitthari ddiwa vawi yoheengereya.

³ Mooweeriha athwaanyu wi yoone ddoohoosa. Mooniwiriha vinyo oolezeliha.

⁴ Komave moowelliha embendela wa ayo enawoovani wi evulluwellewo muura.

⁵ Ookondiwaanyu yaakiheriwe avulluseni ni nnattanatta nanyu, munaakhulle hiyaano.

⁶ Mulluku ari onipuroni naye naweella, oolonjeza wi, “Kineerewuukawellani ellapo ya Shekemu moohakallalla, kineerewuuphadderani malire mu ntapo na Sukoti.

⁷ Giliyadi tti aaka, Manase tti aaka, Efuremu tti echipewaaka yookiteteza, Yuda tti ekopwaaka yoomwene.

⁸ Mowabu tti embalaaka yoonawellamo, Edomu tti voonyingallavo esapato ddaka, kineerokhuwa moohakallalla kimugonjihalle Filistiya.

⁹ Ttaani anaakiphiyihe o muzinda wampanda? Ttaani anaakihoollelle o Edomu?

¹⁰ Khemuhiyo nyu Mulluku oyo munitathillalle? Tti nyu Mulluku muhiyalle waavelleella akhotwaahu.

¹¹ Nikavihereni ollipana ni adanaahu vawi nikavihero na muthu tti noohikhalla ni mutteko.

¹² Mulluku akhalla ni hiyaano nineerowana ekhoto moollipa murima vawi tti olliye anaawaanyingallelle adanaahu.”