Masalimo 6 - Mawu a Mulluku

Ovekella okaviheriwa va ddookatamiha

Wa oohoollella wiipa, voottakihani miipello a Gititi. Salimo na Davide.

¹ Apwiya, mu osha murima wanyu muhinakisimwella, mu onanariwa wanyu muhinakillaka.

² Apwiya keerelleni echifundo, vawi miyaano tti oofooka Apwiya kichiriheni, vawi makhuvaaka aheengereya.

³ Apwiya kinaahoosiwe ophiyera niini?

⁴ Hokollowani Apwiya, waawoni mukaakihere, kivulluseni ekaamba ya echikondaanyu yoohisintheya

⁵ Vawi muthu akhwa khawuupuwellani, ellapo ya ookhwa khaavo anaawuthokozeni.

⁶ Kootopana wiipullella, erive mahiiyu kinnanaaniha yoohameella murwaaka ni miitthori. Kinnaddalliha maaddi vookona vaka ekaamba ya winlla waka.

⁷ Miitthwaaka aawa epiphi ni winlla, aafooka ekaamba ya adanaaka attheene.

⁸ Mukivenyerevo, nyu attheene oonanara vawi Apwiya ahiiwa winlla waka.

⁹ Aakiiwa ovekella waka, alliwa aakaakhulla.

¹⁰ Adanaaka eneeronyaambuseya ni woopopiheya moorurumusa eneerothawa moowulliha muru.