Masalimo 59 - Mawu a Mulluku

Ovekella ovullusiwa

Wa oohoollella wiipa, voottakihani miipello a nchipo nawi Muhinoononga. Salimo na Davide na mutundu wa Mikitamu. Saulo aari aarumalle athu wi yallipe enyumba ya Davide wi emwiiphe.

¹ Nyu Mullukwaaka, kivulluseni wa adanaaka, kitetezeni wa athu ookiwukila.

² Kivulluseni wa athu aweera ddoonanara, kaakihereni wa athu oopaalla okimoriha nikhame.

³ Nyu Apwiya, ngawooneni ayo eniipitthella okumaaka, athu awoopiha ahiiwanana wi ewane ekhoto ni miyaano, naari kihichimwalle apaalle kihilakwille.

⁴ Naari kihilakwille, athwaayo ennathamaka ekhozekella ekhoto. Venyani mukumane ni miyaano nave kiweheni.

⁵ Nyu Apwiya Mulluku Amasiva Mattheene, Mulluku a Israele, venyani wi mwaallake athu attheene a mitundu ddimodda ddittheddene. Muhinamweerella echifundo arive muthu mwa athu oolleka ni eechiwembu.

⁶ Ennawa erive misikuwa yuuwaka wonanko anapwa, eneeteeta m'muzindani.

⁷ Ayo eri nko, ennatokollolla wunchichi, ennakhuwa mweepewe, kaambiiwa m'murimani mwiwa ennallota wi, “Ttaani ananiiwa.”

⁸ Koma nyu Apwiya, munnaattheya, munnaanyaambusa athu a mitundu ddimodda.

⁹ Nyuwaano sika masivaaka, miitthwaaka eri va nyuwaano, nyu Mulluku sika mpandaaka.

¹⁰ Mullukwaaka aneerokichingamella kaambiiwa tti Mulluku a echikondi yoohisintheya. Mullukwaaka aneerokaakhullella wi kihakallalle, vawoonani adanaaka egonjille.

¹¹ Muhinawiiphella vaava, woova wi athwaaka enaatiwalle, koma mwaapallallese ni masivaanyu nave mwaakuhe, Nyu Apwiya, oonitetezaahu.

¹² Ekoliwe ni okota wiwa, ekaamba ya mawu a muwano mwiwa ni mawu avayanoni viwa, kaambiiwa ennatembelela nave ennalleka.

¹³ Muwoononge moowallaanyu, muwoononge wi etthollowe, wi athu edduwelle wi Mulluku sika anamulamulella Yakobo ophiyera omalla wa ellapo yavatthi.

¹⁴ Ennawa erive misikuwa yuuwaka wonanko anapwa, yeeteetaka m'muzindani,

¹⁵ yaashaashaka yoocha, ennakhuwa yaahivona.

¹⁶ Koma kineerekewiipa machipo dda masivaanyu, orive ohinase kineerowiipa mookhuwa machipo ootetheella echikondaanyu yoohisintheya vawi nyuwaano tti mpandaaka, nipuro noothawellamo va enthawi ya ddookatamiha ddaka.

¹⁷ Nyu masivaaka, kineerekowiipellani machipo awuutetheellani, vawi nyu Mulluku sika mpandaaka, Mulluku ookoonihella echikondi yoohisintheya.