Masalimo 57 - Mawu a Mulluku

Nivekello na okaviheriwa

Wa oohoollella wiipa, voottakihani miipello a nchipo nawi Muhinoononga. Salimo na Davide na mutundu wa Mikitamu. Aari athawille wa Saulo, avollowa munikhunguni.

¹ Mukeerelle echifundo, nyu Mulluku, mukeerelle echifundo, vawi kinnathawella wa nyuwaano. Kinnathawella vatthi va muuphellwaanyu ophiyera woononga oviralle.

² Kinnamwinllella Mulluku Amasiva Mattheene, oyo anakeerella ddittheddene nnddo akilonjezilleeye.

³ Mulluku aneerokaakhulla ari oddullu nave aneerokivullusa. Anaarewaagonjiha ookinyingallella, aneerokooniha echikondaaye yoohisintheya ni ororomelleya waye.

⁴ Kinakhalla variyari va athu oowalli ayo enakhalla wonanko mikango. Miinwiiwa tti wonanko mavaka ni mipaamba, nllumi niwa niri wonanko nsupada nawiisha.

⁵ Nyu Mulluku onihani ottekweenaanyu muddullummo, vuwihani ntitimiho nanyu va ellapo yavatthi ettheene.

⁶ Alliwaalle aareya nthavi manyallwaaka, murimaaka wookatamiheya wunchichi, aakata malliti ettilla ddinchichi, koma yaamorellemo weekhiiwa.

⁷ Nyu Mulluku, murimaaka wookeraattheya, murimaaka wookeraattheyesesa. Kineerewiipa nchipo, nchipo nene nawuutitimihani.

⁸ We murimaaka venya, nyu zeze ni gitala, inllani! Kineerovenyiha nndduwa ni nchipo naka.

⁹ Nyu Apwiya, kineerewuuthokozani variyari va mitundu dda athu. Kineerewiipa machipo awuutitimihani variyari va athu a mu ellapo ettheene.

¹⁰ Echikondaanyu yoohisintheya ennaphiya oddullu, ororomelleya wanyu onnaphiya omiraponi.

¹¹ Nyu Mulluku, onihani ottekweenaanyu muddullu mutthemwene, vuwihani ntitimiho nanyu va ellapo yavatthi ettheene.