Masalimo 56 - Mawu a Mulluku

Nivekello na omuroromella Mulluku

Wa oohoollella wiipa, voottakihani miipello a Yonati Elemu Rekokimu. Salimo na Davide na mutundu wa Mikitamu. Afilisti yaari emupharille o Gati.

¹ Nyu Mulluku, mukeerelle echifundo vawi adanaaka ennakihoosa. Aakihella ekhoto ni okinyingallella nllapo nittheene.

² Adani ennapaalla okimirya nllapo nittheene vawi anchichi ennakiwukila mwawiitukhulla.

³ Kawooveemi, kuuroromellani nyuwaano.

⁴ Kinnamutitimiha Mulluku ekaamba ya mawaaye, kinnamuroromella olliye moohoova. Ethiyo muthu ttuukeerella tini?

⁵ Nllapo nittheene adanaaka ennavirikaniha mawaaka, ddittheddene enaganiziiwa tti ddawi ekeerelle ddoonanara.

⁶ Ennatthukumana anayaayove enakiipitthella, ennakithwara manyallo, ennapaalla okiipha.

⁷ Nyu Mulluku, mwaallake ekaamba ya ddoonanara ddiwa, mwaashelle murima, muwoononge.

⁸ Munneerenga othawathawa waka, sungani miitthori ddaka m'munoni mwanyu. Ethiyo nndda khaddilembiwe munibukhuni mwanyu?

⁹ Vano adanaaka eneerohokolloselliwa mutulli, va nllapo nno kinaamwiithaneemi Mulluku, koodduwella wi ari o embalaaka.

¹⁰ Kinnamutitimiha Mulluku ekaamba ya mawaaye, kinnaatitimiha Apwiya ekaamba ya malonjezanwaaye.

¹¹ Kinnamuroromella Mulluku moohoova. Ethiyo muthu ttuukeerella tini?

¹² Nyu Mulluku, kinapaalla weera nnddo kallupenlleemi wa nyuwaano, kineerovelleella mukutho woothokoza wa nyuwaano.

¹³ Vawi mohaakihera okumaaka wa okhwa, mooseera manyallwaaka wi ehikwakwatuwe. Sika kineeta vamiitthoni va Mulluku mu owala wa okumi.