Masalimo 55 - Mawu a Mulluku

Nivekello na nikavihero

Wa oohoollella wiipa, voopharihani mutteko ezida dda enthambo. Endakatulo ya Davide.

¹ Nyu Mulluku, kaapelleni maaru wi mwiiwe oveka waka, muhiipitthe kaawuuvekakani.

² Mukiiwe nave mukaakhulle, murimaaka khori m'mapuroni ekaamba ya ddookatamiha ddaka.

³ Kinnakhupanya ekaamba ya okhuwa wa adanaaka, athu oonanara ennakinyingalela, ennakihoosa wunchichi moosha murima.

⁴ Murimaaka onnavoreya wunchichi, ddawoopiha dda okhwa ddookimorella.

⁵ Woova wookiphiyera nave kinimatthukumella, woova wuullupalli wookimorella.

⁶ Sika kinallota wi, “Kaariki ni muuphello wonanko a nnddiya, keerovavella wuuteete wi kiithuuwe.

⁷ Ddawoona, keerothawella wuuteete wi kakhalle muchipululuni.

⁸ Keerewaakuva ophwanya voothawellavo ephevo yoowalli ni yawoopiha.”

⁹ Nyu Apwiya, virikanihani ollota wa adanaaka, vawi kinoona owukila ni ekhoto m'muzindanimmo.

¹⁰ Otthaana ni mahiiyu alliwa ennaapheella mpandiiwa, m'muzindanimmo mookhalla echiwawa ni ekhoto.

¹¹ Vohoonongeya virive veko mwemmo m'misikani mwiwa mookhalla opanikizana ni ollekana.

¹² Aariki mudanaaka anakivevulla, kaaweerovillella, aariki mudanaaka anakeerella epewe, kaaweerewiipittha.

¹³ Koma tti weyaano mukhwaaka oneera ddenndda, mukhwaakakhwaaka, mukhwaaka avanikutthani.

¹⁴ Naanakambirana phaama niri eelli, naanallapella nimodda mu enyumba ya Mulluku.

¹⁵ Okhwa waamorelle moorurumusa, evuhelliwe mu mahame eri akumi vawi ddoonanara ddiwa ddooddalla m'murimani mwiwa ni mu enyumba mwiwa.

¹⁶ Koma miyaano kinaaveka Apwiya, alliwa eneerokikavihera.

¹⁷ Misikuwa, ohinase ni otthaana kinnakhupanya ni winlla, alliwa eneerewiiwa mawaaka.

¹⁸ Eneerovullusa okumaaka kaawanaka ekhoto vawi athu anchichi ennakangana ni miyaano.

¹⁹ Mulluku oyo anakhalla va mpando woomwene waambeella khalle, aneerokiwanella ekhoto, aneerewaagonjiha vawi khenapaalla osintha, khenamoova.

²⁰ Mukhwaaka annaallika akhwaaye otathilla echipanganwaaye.

²¹ Mawaaye ennasalala wonanko batala komave m'murimani mwaye muri ekhoto. Mawaaye ennoollowa okhwaranya makhura komave aakhalla ni masupada awiisha.

²² Areye Apwiya ddookhupanya ddawo, alliwa eneerewuuseera, kheyaakhullella wi oolungamiiwa atikheye.

²³ Koma Nyu Mulluku muneerewaavokhella adanaaka mu nlliti noowallamella nawoononga. Athu awiipha ni awoottha khephiya naari hafu a mallapwiiwa ookumi. Koma nyu Mulluku, kineerewuuroromellani.