Masalimo 52 - Mawu a Mulluku

Echiweruzo ya Mulluku ni echifundwaaye

Wa oohoollella wiipa. Endakatulo ya Davide. Doegi o Edomu aari amulleelle Saulo wi Davide aaya wa Ahimeleki.

¹ We amasiva kaambiiwa tini onakotelleewe ddoonanara, echikondi yoohisintheya ya Mulluku tti yoohimalla?

² We awoottha onaganiza ddawoononga, nllumi nanyu tti wonanko mpeni wawiisha.

³ Onnakonda ddoonanara okhwaranya ddaphaama, onnaddivelliwa ddawoottha okhwaranya ddawoona.

⁴ We a nllumi noolleka Onnakonda ollota ddawaahoosa amodda.

⁵ Koma Mulluku aneerewuunyenya wa enthawi yoohimalla, aneerowuuphara ni wuukhumihella otte wa enyumbaawo, aneerewuutulla mu ellapo ya athu ookumi.

⁶ Oolungama eneerewoona ni woova, eneerewuuttheya voollotani wi,

⁷ “Ngamooneni muthu oyo ahinapaalla omuroromella Mulluku, koma anahameella eyuumaaye yawaata, anallipihella weera ddoonanara.”

⁸ Koma miyaano kiri wonanko muteekho mukitthi wa olivi mu enyumba ya Mulluku. Murimaaka onakhalla va echikondaaye yoohisintheya enthawi ettheene.

⁹ Nyu Mulluku, kineerewuuthokozani wa enthawi yoohimalla ekaamba ya nnddo mweerilleenyu. Kineerewuutitimihani vamiitthoni va athu awuukondani vawi nyuwaano tti aphaama.