Masalimo 51 - Mawu a Mulluku

Nivekello na okhululukiwa

Salimo na Davide. Namallotella Natani aari amuhumullullalle ekaamba yoomukusa Batesheba.

¹ Nyu Mulluku mukeerelle echifundo, moollikana ni echikondaanyu yoohisintheya. Muvuhellelle machimwaaka, moollikana ni echifundwaanyu yuullupalli

² Mukihapihe o ddoolakwa ddaka ddittheddene, mukeellihe o machimwaaka.

³ Ddoolakwa ddaka kinnaddidduwella, machimwaaka eri vamiitthoni vaka enthawi ettheene.

⁴ Kohuuchimwellani nyuwaano, nyuwaano nyookha, koheera ddoonanara vamiitthoni vanyu. Wi mukhalle oolungama vaweeruzani, mukhallettho aweella vaweeruzani vookamullani mullatwaaka

⁵ Ddawoona, kaayarelliwa mu machimo, kaakhalla mu machimo waambeella mvo amoowaaka yakusalliiwa erukullu ya miyaano.

⁶ Ddawoona, munnaddivelliwa ni murima wawoona, sika mukihuddihe ezeru ddanyu.

⁷ Keelliheni ni hisope* o machimwaaka nave kineereweella, kihapiheni nave kineereweellesesa okhwaranya nthoche.

⁸ Mukeerihe wi kihakallalle nave kittheye, naari mukipwesillepwesille makhuva, mukaakhullelle kihakallallettho.

⁹ Muhinaweha machimwaaka, muvuhellelle ddoonanara ddaka.

¹⁰ Mukiphatuselle murima waweella, nyu Mulluku, muhiye mwa miyaano murima wanaanweene ni wookeraattheya.

¹¹ Muhinakiikariha vamiitthoni vanyu, muhinavenyiha munepaanyu Waweella mwa miyaano.

¹² Mukihokolloselle ohakallalla wa ovullusa wanyu, mullipihe mwa miyaano munepa woopaallesesa owiiwellellani.

¹³ Vano oochimwa kineerewaalangiza ettilla ddanyu, oolakwa eneerohokollweella wa nyuwaano.

¹⁴ Mukaakihe o mullatu wa nikhame, nyu Mulluku, Mulluku oovullusaaka, kineerowelliha mawaaka vawiipani dda ovullusa wanyu.

¹⁵ Apwiya hullani vayanoni vaka wi yuutitimiheni nyuwaano.

¹⁶ Khohiyo mukutho shisha oyo onuuhakallallihani nyuwaano. Kavelleelleke mukutho wooshellelliha, nyuwaano khamwaahakallallena.

¹⁷ Mukutho oyo munahakallalleenyuna tti murima wawiiyeviha, murima wa ethakaraka ni woorukunuwa, nyu Mulluku khamuwuvevulla.

¹⁸ Muweerelle ddaphaama athu a o Ziyoni ekaamba ya oreera murima wanyu, mumakettho mpanda wa Yerusalemu.

¹⁹ Vano muneerohakallalla ni mikutho ddoophwanella, mikutho ddawoosa ni ddooshellelliha. Sika eneerovelleella anankhoro a eng'ombe vanikuwani.