Masalimo 50 - Mawu a Mulluku

Ovekella wawoona

Salimo na Asafu.

¹ Apwiya Mulluku Amasiva Mattheene animallota, anawiithana athu attheene a va ellapo yavatthi, ovenyera wookhuma nndduwa ophiyera woovollowa nndduwa.

² Apwiya ennawala mu Ziyoni, muzindiiwa wooreeresesa.

³ Mullukwaahu animawa, kheera ellapo tuu. Muhoollo mwaye mookhalla mallumi amunllo, moowaapheella mwaye mutthemwene mookhalla ephevo yamasiva.

⁴ Anniithana ddamuddullu ni dda ellapo yavatthi wi ddikhalle amboni aaweeruzaka athwaaye.

⁵ Olliye anallota wi, “Tthukumanani vamiitthoni vanyu, athwaaka oororomelleya, ayo yapanganne ni miyaano voovelleellani mukutho.”

⁶ Ddamuddullu ddinnallalleya dda echilungamo ya Mulluku vawi olliye sika ari aweeruza.

⁷ “Nyu athwaaka ngiiwani, miyaano kineerollota, kineerovelleella omboni wawuuvaanyihani Aisraele. Mi tti Mulluku, Mullukwaanyu.

⁸ Nginuuhumullullani ekaamba ya mikutho ddanyu, vawi munnavelleella mikutho ddanyu ddooshellelliha wa miyaano enthawi ettheene.

⁹ Ngaakhella erive eng'ombe apaalle epuri ya m'makhollani mwanyu.

¹⁰ Vawi erive enama ya muutthakoni tti yaaka ni enama ddittheddene dda m'miyaangoni ddinchichi.

¹¹ Epallame ddittheddene ddamuddullu, ddookumi ddittheddene ddaweeta muhakani tti ddaaka.

¹² Kaariki ni ettalla ngaawuulleelleni, vawi ellapo yavatthi ni ddittheddene dda mwemmo tti ddaaka.

¹³ Ethiyo kinnattakhuna enama ya eng'ombe apaalle owirya nikhame na epuri?

¹⁴ Koma muthokozeni Mulluku wonanko mukutho, mweere ddittheddene mwallupenlleenyu wa Amasiva Mattheene.

¹⁵ Muvekelle wa miyaano va nllapo na ddookatamiha, miyaano kineerewuuvullusani nave muneerokititimiha.”

¹⁶ Koma wa oonanara Mulluku anallota wi, “Oniihoosella tini ni oromolla malamulwaaka? Kaambiiwa tini vayanoni vawo vinallotiiwa dda echipanganwaaka?

¹⁷ Onniitana ni malangizwaaka, onnatathilla mawaaka.

¹⁸ Wamoona mullupaawiiya onnatthattuwa mukhwaaye, oneeta ni athu a echigololo.

¹⁹ Khonoova ollota ddoonanara ni eyanwaawo, nllumi nawo ninnallota ddawoottha.

²⁰ Onnakeraatthi onamullota miseche mbalaawo, onnatetemura dda ookhumana erukullu emodda.

²¹ Weyaano waheera ddeko ddenndda, miyaano kaamoona oweha, Waganiza wi kinnaphwanaphwana ni weyaano, koma vano kinnuuhumullulla ni owoonihella nnddo weerilleewe.

²² Vano ganizani phaama nndda, nyu ayo munamutiwalla Mulluku wi kineerewuukhaddullani, khaavothi anaawuuvulluseni.

²³ Koma othokoza wonanko mukutho onakititimiha, oyo aneera ddenndda, kineeromoonihella ovullusa waka.”