Masalimo 5 - Mawu a Mulluku

Ovekella echitetezo

Wa oohoollella wiipa, voopharihani mutteko ezitoliro. Salimo na Davide.

¹ Apwiya, apellani maaru mawaaka, kiiwellelleni wiipullella waka.

² Mullukwaaka, mwenaaka, iwani winlla waka, wa nyuwaano kinnavekella.

³ Apwiya, ohinase munniiwa mawaaka, nndduwa naakhumaka kinnavekella wa nyuwaano nave kinnatiyerella wi mukaakhulle.

⁴ Nyu tti Mulluku oyo ahinahakallalla ni machimo. Khamunaakhullella ddoonanara vamiitthoni vanyu.

⁵ Awiitukhulla khewora wooneyella vamiitthoni vanyu, munniitana ni athu attheene aweera ddoonanara.

⁶ Nyuwaano munnawoononga athu awoottha. Apwiya munnananariwana awiipha ni oolleka.

⁷ Koma miyaano kineerovollowa mpa mwanyu, ekaamba ya echikondaanyu yoohisintheya. Kineerokokhora moowarama, owiitthoni wa enyumbaanyu yaweella nave kineerewuullapellani.

⁸ Apwiya, kihoollelleni mu echilungamwaanyu, ekaamba ya adanaaka. Kipotokoselleni ettilla munapaalleenyu wi kithware.

⁹ Vawi muwano mwa adanaaka mooddalla ddawoottha. Murimiiwa onnapaalla woononga. Ommilloni wiwa tti wonanko mahame ookatakata, nllumi niwa ninnallota ddoolleka.

¹⁰ Mulluku, areyeni machimo va muru viwa, opangana wiwa woonanara waakuhe weekhiiwa. Mwaavenyihevo vamiitthoni vanyu, ekaamba ya machimwiiwa manchichi, vawi ennuuwukilani nyuwaano.

¹¹ Koma ehakallalleke attheene ayo enathawella wa nyuwaano, yiipeke moohakallalla enthawi ettheene. Mwaakhupaarelle, wi ookonda nnddina nanyu ehakallalle mwa nyuwaano

¹² Nyu Apwiya munnaadalisa athu oolungama, oreera murima wanyu onakhalla wonanko yawaateteza.