Masalimo 49 - Mawu a Mulluku

Ororomella eyuuma tti okarangeya

Wa oohoollella wiipa. Salimo na edduullu dda Kora.

¹ Nyu athu a mitundu ddittheddene, iwani nndda, nyu attheene ookhalla va ellapo yavatthi, apellani maaru,

² athu shisha ni oovuweene, eeyuuma ni oohooweene!

³ Mawu avayanoni vaka enaakhalle eezeru, maganizo a murimaaka enaakhalle oowallamella.

⁴ Kineerewaapella maaru mwambi, kineerottaphullella vawiipani nchipo ni gitala.

⁵ Ethiyo kinaawoovelleke tini va enthawi ya ddookatamiha mvo athu ookihoosa enaakaapheelliiwa?

⁶ Athu awi ddiidda ennaroromella eyuumiiwa, ennakota kaambiiwa aakhalla ni eyuuma.

⁷ Ddawoona, khaavo muthu anaaddoopolle, ovelleella mutengo woovullusella okumaaye wa Mulluku.

⁸ Vawi woopolla okumi wa muthu tti woowallamella mutengo, khawora okwakhwaniha,

⁹ wi akhalleke ni okumi woohimalla, oohoona mahame.

¹⁰ Ddawoona, arive muthu annoona wi naari eezeru ennakhwa, emoddamoddave yeeyo ookarangeya ni oolloddowa, attheene ennaahiyera amodda eyuumiiwa.

¹¹ Mahamiiwa sika owaniwa wa enthawi yoohimalla, mapurwiiwa a mibado ddittheddene, naari yavahaka manddiniiwa ellapo ddiwa yaariiwa akumi.

¹² Naari muthu akhalle eeyuuma mwawiidde komave aneerokhwa wonanko enama yamuhakani.

¹³ Ddenndda sika ddinaamorella athu ayo eniiroromella mookarangeya, tti omalla wa attheene enathwara maganizo awi ddiidda.

¹⁴ Enaphwanella oya o ellapo ya ookhwa wonanko enkhosa, okhwa oneerokhalla mbusiiwa. Athu oolungama eneerewaapambana, eneerokittha oya omahame, miilli ddiwa ddineerewunta, owaniwa oneerokhalla omahame.

¹⁵ Koma Mulluku aneerewoopolla okumaaka o olamulello wa mahame, ngiwa koova vawi aneerokaakhella.

¹⁶ Ddihuuvoreyeke muthu mmodda aakhallaka ni eyuuma, eyuuma ya mpa mwaye yaawoonjerereyaka.

¹⁷ Kaambiiwa aakhwaka khakusa ello, eyuumaaye khathaananana.

¹⁸ Naari addeesaka oodala akhalla mukumi, naari avahiweke olemu ddeko ddaamweetellaka phaama,

¹⁹ akhwa ni okumana ni makhollwaaye mattheene, khawattho oonawo owala.

²⁰ Naari muthu akhalle eeyuuma mwawiidde, koma anarama ezeru, anaakhwe wonanko enama yamuhakani.