Masalimo 48 - Mawu a Mulluku

Ziyoni muzinda wa Mulluku

Salimo na edduullu dda Kora.

¹ Apwiya tti uullupalli, tti oophwanella waatitimiha wunchichi, m'muzindani mwiwa, vamwaangoni viwa vaweella.

² Mwaangooyo, Ziyoni tti wooreera, woohakallalliha ellapo yavatthi ettheene. Ziyoni oyo ari ompoto, tti muzinda wa Mwenaahu muullupalli.

³ Mulluku ari muwari mwa muzindooyo, ooddooniha yeekhaaye wi tti ooteteza.

⁴ Mamwene yaatthukumana, opaalla owanana ekhoto.

⁵ Koma yoonilliiwa muzindooyo yaarurumuwa, yahoova, ethawa moopallalleya.

⁶ Yaatthukumella ni woona ovoreya wunchichi wonanko mutthiyana enthawi yooyara.

⁷ Nyu Mulluku mwaawoononga, wonanko mmo ephevo ya wookhuma nndduwa enoonongelliiwa ekallawa ddooya o Tarishishi.

⁸ Nnddo hiyaano niiwalleehu, nooddoonattho ddennddo mu muzinda wa Apwiya Amasiva Mattheene. Aneerokeraatthi muzindaaye wa enthawi yoohimalla.

⁹ Nyu Mulluku, nakhalla mpa mwanyu, ninnaganizera dda echikondaanyu yoohisintheya.

¹⁰ Nyu Mulluku monga nnddina nanyu emoddamoddave yeeyottho ntitimiho nanyu ophiyera wookomella ellapo ettheene yavatthi. Nnattanatta nanyu nooddalla ni echilungamo.

¹¹ Athu a o mwaango wa Ziyoni ehakallalle, a o Yuda ehakallalle ni echiweruzwaanyu yoolungama.

¹² Etani moomwaapheella Ziyoni muttheene, apheellani muzinda muttheenooyo, mweerenge mattatthiiwa.

¹³ Wehesesani phaama esiri ddiwa ddoollipa, onesesani phaama mpandiiwa, wi muwore otthopoollella mbado wamuhoollo wi,

¹⁴ “Mullukwaahu tti awi ddiidda, tti Mullukwaahu waambeella enthawi yoohimalla, tti oohoollellaahu wa enthawi yoohimalla.”