Masalimo 46 - Mawu a Mulluku

Mulluku ari ni hiyaano

Wa oohoollella wiipa, voottakihani miipello a Alamoti. Salimo na edduullu dda Kora.

¹ Mulluku sika woothawella waka ni masivaaka, tti ookhozeka onikavihera va enthawi ya ddookatamiha.

² Ekaamba ya yeella khannoova naari ellapo yavatthi etikheye, naari miyaango ddimorenlle variyari va enyanja,

³ naari enyanja ddoopeke owalli ni okhuma niphoru, naari miyaango dditthukumelle ekaamba ya othuruma wa enyanja.

⁴ Koma wookhalla muhinje oyo mitthipidda ddaye ddinahakallalliha muzinda wa Mulluku, nipuro nookhallawo Amasiva Mattheene.

⁵ Mulluku ari muwari mwa muzindooyo khotikheya aneerowukavihera nndduwa nihinakhume.

⁶ Mitundu dda athu ddinnatthukumella wunchichi, moomwene ennatikheya. Mulluku allotaka mookhuwa, ellapo yavatthi ennattotthowa.

⁷ Apwiya Amasiva Mattheene eri ni hiyaano, Mulluku a Yakobo sika woothawella wahu.

⁸ Waawoni moone mitteko dda Apwiya, mmo eneerelliiwa ddoottikhiniha va ellapo yavatthi.

⁹ Ennamalliha ekhoto va ellapo yavatthi ettheene. Enninttaka muura, ennakotholla nivaka, ennaahella munllo magareta akhoto.

¹⁰ “Khurumuwani, dduwellani wi miyaano tti Mulluku. Mitundu dda athu ddinnakititimiha, a ellapo yavatthi ennakititimiha.”

¹¹ Apwiya Amasiva Mattheene eri ni hiyaano, Mulluku a Yakobo sika woothawella wahu.