Masalimo 45 - Mawu a Mulluku

Nchipo na okwati wa mwene

Wa oohoollella wiipa, voottakihani miipello a Shoshani. Endakatulo ya edduullu dda Kora. Nchipo nookwati.

¹ Murimaaka wooddalla ni mwaha waphaama, kinamwiipella mwene echipwaakeella. Nllumi naka niri wonanko yoolembella ya muthu eeruso yoolemba.

² Nyuwaano tti ooreera waakhwaranya akhwiinyu attheene, vayanoni vanyu vinnakhumiha ddaphaamave. Ella sika ekaambiiwa Mulluku uudalisalleeyeni wa enthawi yoohimalla.

³ Nyu amasiva, makellellani nsupada nanyu muyuununi, mu oriiheya wanyu ni ottekweenaanyu.

⁴ Oneyani mu oriiheya wanyu, muteteze yawoona, wiiyeviha ni echilungamo, nnatta nanyu noonihe mitteko ddanyu ddawoopiha.

⁵ Mipaamba ddanyu ddawiisha ddinnahoma mirima dda adanaanyu, mitundu ddimodda dda athu ddinnagonja vamiitthoni vanyu.

⁶ Nyu Mulluku, mpandwaanyu woomwene tti wa enthawi yoohimalla, munneeruza moolungama mu omwenaanyu.

⁷ Munnakonda echilungamo, munniitana ni ddoonanara. Sika ekaambiiwa Mulluku, Mullukwaanyu, uuzozilleeyeni ni makhura oohakallalliha waakhwaranya akhwiinyu attheene.

⁸ Ddoowara ddanyu ddinnuunkhella makhura a mure,* a aloe* ni a kasiya, enyumba ddanyu ddoomwene tti ddoomakiwa ni manyaka a ethepo, mwemmo ddawiipa dda enthambo ddinnuuhakallallihani.

⁹ Anamwani aatthiyana a mwene eri variyari va atthiyanaanyu ooriiheya, onnattanatta nanyu wohiimella mwene aamutthiyana, oowara ddoowara dda golide a o Ofiri.

¹⁰ Vano iwa, we mutthiyana ootthelliwa, ngiiwa mawaaka nave apella maaru, Atiwalle abalaawo navettho a mpa mwa attiittho.

¹¹ Mwene aneerewuupaalla ekaamba ya oreera wawo, mukokhorelle vawi tti apwiiyo.

¹² Athu a o Tiro eneeroowa ni emphaso, athu eeyuuma eneeroveka echifundwaawo.

¹³ Ni eyuumiiwa yoohiyanahiyana. Mwaana aamutthiyana a mwene ari mu echipindaaye, olliye ohiireeriha wunchichi, oowara ddoowara ddoolluwa ni golide.

¹⁴ Enamuyaana wa mwene awanre ddoowara ddamalluwa ni anamwalli akhwaaye oomuvelleella.

¹⁵ Enavelleelliiwa ni ehakallallo voovollowani mu enyumba ya mwene.

¹⁶ Nyu mwene edduullu ddanyu ddineerovollowa munipuroni na makhollwaanyu, muneerewaatthattusa mamwene va ellapo yavatthi ettheene.

¹⁷ Kineerovuwiha nnddina nanyu o mibado ddittheddene sika athu eneerewuuriihani wa enthawi yoohimalla.