Masalimo 44 - Mawu a Mulluku

Nivekello na echitetezo

Wa oohoollella wiipa. Endakatulo ya edduullu dda Kora.

¹ Nyu Mulluku, nahiiwa ni maarwaahu, makhollwaahu yaanilleella nnddo mwaweerelleenyu mu enthawiiwa, mallapo akhalle.

² Nyuwaano mwahiikariha mitundu ddimodda dda athu, koma makhollwaahu mwahaakeraatthiha mu ellapwiiwa. Nyu mwaahoosa mitundu ddimodda dda athu, koma makhollwaahwaayo mwahaavaha murendelle.

³ Alliwa kheyaawakhille ellapo voopharihani mutteko nsupada niwa, kheyaapambanille vakhotoni ekaamba ya masiviiwa. Koma yaagonjiha ekaamba ya masivaanyu, ekaamba ya owala wa ekhovaanyu vawi mwaahakallallana.

⁴ Nyuwaano tti mwenaaka ni Mullukwaaka, mwaamupambaniha Yakobo vakhotoni.

⁵ Ni nikavihero nanyu nahaagonjiha adanaahu, ni masivaanyu nahaanyingallella ooniwukila.

⁶ Nginaroromella muuraaka, naari nsupada naka khanikivullusa.

⁷ Koma nyuwaano moonaakihera wa adanaahu, mohaawulliha muru ayo eniitana ni hiyaano.

⁸ Ninnamukotella Mulluku enthawi ettheene, ninnathokoza nnddina nanyu wa enthawi yoohimalla.

⁹ Komave nyuwaano moonikhoota nave mooniwulliha muru, khamwaathaananena akhotwaahu.

¹⁰ Mohaakhullella wi adanaahu eniikarihe, awiitana ni hiyaano aanaakha katundwaahu.

¹¹ Nyuwaano moonitthattusa enkhosa ddooya wowiiphiwa, moonipallallesa variyari va mitundu ddimodda athu.

¹² Mohaakulliha athwaanyu mookittha mutengo, kheyiivo muphuralleenyu.

¹³ Moonitthattusa athu oovevuwa wa akhwiihu awaatamana, athu oonaapheella ennanittheya ni oninyemulla.

¹⁴ Moonitthattusa oonyemulliwa variyari va mitundu ddimodda dda athu, akhwiihu ennatikha muru moonittheya.

¹⁵ Nllapo nittheene kinnawulliwa muru, ekhovaaka yoomora ekaamba yeeyo,

¹⁶ vawiiwani mawu ooniroma ni ooniruwana, voomoonani mudanaaka, ookihokollosella ddoonanara.

¹⁷ Ddittheddenendda ddoonimorella, naari nahuutiwanlleni, apaalle otathilla echipanganwaanyu.

¹⁸ Murimaahu khuwahokollweelle mutulli, manyallwaahu kheyaahiyalle ettilla ddanyu.

¹⁹ Komave nyuwaano mooninyenya, moonihiya variyari va akhatwe muhakani ni onihuruwella ni epiphi yawoopiha.

²⁰ Natiwanlleke nnddina na Mullukwaahu, omullapella mulluku eelleto,

²¹ ethiyo Mulluku khaaddiphwanye ddenndda? Vallethi annadduwella ddawiipittheya dda m'murimani.

²² Koma mallapo mattheene ninnoopopihiwa wi niiphiwe ekaamba ya nyuwaano, nineesiwa wonanko enkhosa ddinaya wawiiphiwa.

²³ Nyu Apwiya venyani! Kaambiiwa tini munakoneenyu? Venyani, muhinanikhoota wa enthawi yoohimalla.

²⁴ Kaambiiwa tini muniipitthiheenyu ekhovaanyu? Mutiwallelle tini ddoohoosa ddahu ni onyingallelliwa wahu?

²⁵ Nohiikuhella munthupini, mwiillaahu ori muthayani kwalaa!

²⁶ Venyani muwe munikavihere, noopolleni ekaamba ya echikondaanyu yoohisintheya.