Masalimo 42 - Mawu a Mulluku

Nibukhu naneepiilli Masalimo 42—72 Ovekella wa muthu a wuukaporoni

Wa oohoollella wiipa. Endakatulo ya edduullu dda Kora.

¹ Monga mmo epaalla enapaallelliiwa muhinje wa maaddi, tti mwemmo murimaaka onuupaallelliiwani, nyu Mullukwaaka.

² Murimaaka wookhalla ni nthona noomupaalla Mulluku, Mulluku mukumi. Ethiyo kinaaphiye niini vamiitthoni va Mulluku?

³ Winlla sika yoochaaka otthaana ni mahiiyu, athu ennakittheya voollotani wi, “Mullukwaawo ari wuuwi?”

⁴ Murimaaka onnavoreya kaawuupuwellaka mmo keetelleemi ni athu anchichi, vawaahoollellani o enyumba ya Mulluku, athu anchichi ekhuwaka moohakallalla, yiipaka machipo oothokoza, yeeraka ehakallallo.

⁵ Kaambiiwa tini onamoriweewe ethakaraka, we murimaaka? Kaambiiwa tini onakatamihiweewe muwari mwaka? Muroromelle Mulluku vawi kineeromutitimihattho, oyo ari oovullusaaka ni Mullukwaaka.

⁶ Nyu Mulluku, kootathilla murima, sika kinnawuupuwellani kiriimi mu ellapo ya Yordani, o Heremoni, o mwaango wa Mizara.

⁷ Maaddi a voowallamella eniithanana, maaddaanyu ennaturuma mwawoopiha, mafundaanyu mang'onong'ono ni muullupalliine aakimirya.

⁸ Otthaana Apwiya ennooniha echikondiiwa yoohisintheya mahiiyu kinniipa nchipo niwa ni omuvekella Mulluku a okumaaka.

⁹ Kinnakoha wa Mulluku nlluku naka wi, “Ethiyo Mukitiwallelle tini? Ethiyo kinaaweetelleke tini kinllaka ekaamba ya opaniwa ni mudanaaka?”

¹⁰ Ovevulla wa adanaaka onnakivoreya wonanko nikhwata nookhwana na m'mwiillini mwaka, yaakikohaka enthawi ettheene wi, “Mullukwaawo ari wuuwi?”

¹¹ Kaambiiwa tini onamoriweewe ethakaraka, we murimaaka? Kaambiiwa tini onakatamihiweewe muwari mwaka? Mutiyere Mulluku vawi kineeromutitimihattho, oyo ari oovullusaaka ni Mullukwaaka.