Masalimo 41 - Mawu a Mulluku

Ovekella wa muthu oovoriiwa

Wa oohoollella wiipa. Salimo na Davide.

¹ Oodalisiwa tti muthu oyo anaaganizella oohoowa, vawi Apwiya eneeromuvullusa va nllapo na ddoohoosiwa.

² Apwiya eneeromuteteza ni omusunga ni okumi, aneeroromolliwa wi tti oodalisiwa va ellapo yavatthi, khemuhiya m'mattani mwa adanaaye,

³ Apwiya eneeromukavihera aavoriiwaka, eneeromuchiriha ereta ddaye.

⁴ Vano kaallota wi, “Nyu Apwiya, keerelleni echifundo, kichiriheni vawi kohuuchimwellani.”

⁵ Adanaaka ennallota ddoonanara wa miyaano wi, “Ethiyo muthu yoolla anaakhwe niini wi atiwalleye?”

⁶ Ayo enawa wi ekoone tti oohiroromelleya, m'murimani mwiwa enaganiza ddoonanara dda miyaano, yakhuma, ennaya yaddillalleyaka.

⁷ Attheene awiitana ni miyaano ennanong'onellana, ennakaashella ddoonanara voollotani wi,

⁸ “Yommorella ereta eyo anaakhweeyena, khavenyattho mvo akonaatthilleeye.

⁹ Naarittho mukhwaaka a vamurimani, oyo kamuroromelleemi, oyo kacheemina, ookiwukila.

¹⁰ Nyu Apwiya, keerelleni echifundo, kichiriheni wi kaahokolloselle ddoonanara athwaayo.

¹¹ Mweeddiiddo kineerodduwella wi munnakihakallallella, vawi adanaaka khekipambana.

¹² Nyuwaano munnakiseera ekaamba ya ohilakwa waka, munnakikeraatthiha vamiitthoni vanyu wa enthawi yoohimalla.

¹³ Etitimiheye Apwiya Mulluku a Israele, waambeella enthawi yoohimalla wa enthawi yoohimalla! Amen! Amen!”