Masalimo 40 - Mawu a Mulluku

Nchipo noothokoza

Wa oohoollella wiipa. Salimo na Davide.

¹ Kahaatiyerella Apwiya ni murimaaka muttheene wi ekikavihere, yaawaramella vatthi ekiweha, yiiwa winlla waka.

² Yaakiruulla mu nlliti nawoopiha, ehime yamatokwi. Yaakiimesa vanllukuni, ekeetiha phaama.

³ Yaahiya nchipo nanaanweene muwano mwaka, nchipo noomutitimiha Mullukwaaka. Athu anchichi eneeroddoona ddenndda nave eneerewoova ni waaroromella Apwiya.

⁴ Oodala tti muthu oyo anaaroromella Apwiya, muthu oyo ahinahapuwella o mafano, othwara milluku ddawoottha.

⁵ Nyu Apwiya Mullukwaaka, mooweerella ddoottikhiniha anchichi, moonikhonzera ddoolinga ddaphaama. Khaavo naari mmodda anaphwanaphwana ni nyuwaano. Keehina killota nave kitthopoolle dda ddenndda, ngiwora weerenga ddittheddene ekaamba ya waata wiiwa.

⁶ Khamwaapanlle mikutho ni ddoovelleella, koma mookivaha maaru wi kiiwellekena. Khamwaavekille mikutho ddooshellelliha, ni mikutho ddoopepesella machimo.

⁷ Vano kaallota wi, “Koowa, munibukuni moolembiwa dda miyaano.

⁸ Weera nnddo munapaalleenyu, nyu Mullukwaaka, onnakiddivella malamulwaanyu eri m'murimani mwaka.

⁹ Koollalleya dda echilungamwaanyu vamutthukumanoni muullupalli. Nyu Apwiya, ngaawanlle vayanoni, moollikana ni mmo munadduwellelleenyu,

¹⁰ Ngaavitthalle m'murimani mwaka dda oolungama wanyu, kaallota dda ororomelleya wanyu ni dda ovullusa wanyu. Va mutthukumano muullupalli ngaavitthalle dda echikondaanyu yoohisintheya ni dda ororomelleya wanyu.

¹¹ Muhinakivenyihera echifundwaanyu, nyu Apwiya, echikondaanyu yoohisintheya ni ororomelleya wanyu ddinnakisunga.”

Nivekello na nikavihero

¹² Kohaapheelliwa ni ddookatamiha ddooheerengeya, machimwaaka aakihuruwella sika ngiwora woona, tti manchichi okhwaranya meehi a m'muruni mwaka kootathilla murima wunchichi.

¹³ Nyu Apwiya, kivulluseni! Nyu Apwiya, akuvani okikavihera!

¹⁴ Evevuwe nave ewulliwe muru attheene enaashaasha okumaaka. Ehokollweelle mutulli, ethawe mwanampallalla ayo enapanganella yoonanara.

¹⁵ Ayo enakinyemulla wi, “Ha, ha” ewulliwe muru vawoonani wi aalephela.

¹⁶ Koma attheene oowaashaashaani ehakallalle ekaamba ya nyuwaano. Attheene oohakallallella ovullusa wanyu ellotekelloteke wi, “Apwiya tti uullupalli!”

¹⁷ Mi tti oofooka nave oohoowa, koma khamukituwanlle, nyu Apwiya. Nyu tti ookikaviheraaka ni oovullusaaka, nyu Mullukwaaka, muhinaselliwa okikavihera.