Masalimo 39 - Mawu a Mulluku

Okhupanya wa muthu ookatamihiwa

Wa oohoollella wiipa, voottakihani miipello a Yedutuni. Salimo na Davide.

¹ Kaallota wi, “Kineeropwatha ddaweera ddaka wi kihichimwe voollotani. Kineerowalla vayanoni vaka enthawi ettheene athu oonanara yakhalla ni miyaano.

² Sika kaakhurumuwa woohillota ello, kaamaalleya woohillota naari yaphaama, koma ddookatamiha ddaavirellellave waata.

³ Murimaaka waanaviha, kaganizaganizeemi, murimaaka waakhara munllo, ophiyera kaallota wi,

⁴ ‘Nyu Apwiya, mukilleelle omalla wa okumaaka, mukilleelle oyeva wa mallapwaaka, mukilangize mmo okumaaka onaakuvelliiwa omalla.’

⁵ Ngoonani, mookivaha mallapo ooyeva, enthawi ya okumaaka khe ello vamiitthoni vanyu. Ddawoona, arive muthu tti mpweyave.

⁶ Ddawoona, muthu ari wonanko muuthuuchi, annakatamihiwa ni ddoohikhalla ni mutteko, annasunga eyuuma moohidduwella oyo anaayiche.

⁷ Vano nyu Apwiya, kinatiyera tini? Ororomella waka ori va nyuwaano.

⁸ Kivulluseni o machimwaaka mattheene, muhikitthattuse oonyemulliwa ni ookarangeya.

⁹ Mi tti muthu oohillota, ngihulla vayanoni vaka, vawi tti nyuwaano mweerille ddenndda.

¹⁰ Kivenyihelleni muwashullo, kookokhowa ekaamba ya okiwashulla wanyu.

¹¹ Munnamullaka muthu voomuhumullullani ekaamba ya machimwaaye, munnoononga nnddo anaddikondeeye wonanko enjenjete. Ddawoona, arive muthu tti mpweyave.

¹² Nyu Apwiya iwani winlla waka, muheere ellapo tuu kaawinllellakani, miyaano tti mulleto oohillekella, awaarera wonanko makhollwaaka mattheene.

¹³ Muhikiweheke moowalli, sika kineerowora ohakallalla, kihinakhwe nave kihinathiime.”