Masalimo 38 - Mawu a Mulluku

Ovekella wa muthu oohoosiwa

Salimo na Davide na mukutho wawuupusa.

¹ Nyu Apwiya, muhikihumullulle mu onanariwa wanyu, muhikillake mu osha murima wanyu.

² Mipaamba ddanyu ddookihoma, nnatta nanyu nookiwatakanya.

³ Mwiillaaka khonna masiva ekaamba ya owallaanyu, makhuvaaka aavoriiwa ekaamba ya machimwaaka.

⁴ Machimwaaka ahunnuwa okikhwaranya miyaano, ennakillemella wonanko katundu ookhwaranya masivaaka.

⁵ Makhwataaka ahunta, ennunkha ekaamba ya okarangeya waka.

⁶ Kooputheya mutthana, koowarama, masivaaka aamalla, kininlla nllapo nittheene.

⁷ Mwiillaaka muttheene wooviha, virive veko vinnakivoreya.

⁸ Kootopa nave koonyenyeya, kinniipullella ekaamba yookatamihiwa.

⁹ Nyu Apwiya munnadduwella ddittheddene kinapaalleemi, khehiyo wi winlla ni murima waka khoniiweya wa nyuwaano.

¹⁰ Murimaaka onnakihiyahiya, masiva aakimallella, miitthwaaka aawa epiphi.

¹¹ Akhwaaka attheene aakirekamella ekaamba ya eretaaka, abalaakattho ennakirapa.

¹² Awaashaasha okumaaka, ennakireya millapa, oopaalla okivoreya ennallota ddookoononga, nllapo nittheene ennapanganella ddoonanara.

¹³ Koma miyaano kiri wonanko muthu oohiiwa, oyo ahinawora wiiwa, kiri wonanko muthu oohillota oyo ahinawora ollota.

¹⁴ Ddawoona, kiri wonanko muthu oohiiwa, kaambiiwa nginawora waakhullavo ello, yaakillotellaka.

¹⁵ Koma vano kinnuutiyerani nyu Apwiya, Mullukwaaka wi muwaakhulle.

¹⁶ Vawi kinnavekella wi, “Muhaakhullelle wi ehakallallelle va miyaano ayo enakinyemulla yoona wi kooserenguwa.”

¹⁷ Kiri vakhuviru wiikuha kinniiwa ovoreya enthawi ettheene.

¹⁸ Kinnaakhullella machimwaaka, kinnakhupanya ekaamba ya onanara waka.

¹⁹ Adanaaka tti akumi ni amasiva, tti anchichi ayo enakiita vihiri ekaamba.

²⁰ Ayo enakihokollosella ddoonanara munipuroni mwa ddaphaama ennakivaanyiha, vawi kinnathwara ddaphaama.

²¹ Nyu Apwiya, muhikihiye meekha, nyu Mullukwaaka, muhikirekamelle.

²² Akuvani okikavihera, nyu Apwiya Mullukwaaka.