Masalimo 37 - Mawu a Mulluku

Mamallihello a athu oonanara ni athu aphaama

Salimo na Davide.

¹ Ddihuuvoreye ekaamba ya athu oonanara, ohinapaallaka okhalla wonanko athu oohilungama,

² vawi mwawaakuva ennanyaalla wonanko munyepu, ennumma wonanko makattha makitthi.

³ Aroromelleke Apwiya nave weereke ddaphaama, khalla mu ellapo nave othwareke ddawoona.

⁴ Hakallalla mwa Apwiya, eneerewuuvaha nnddo murimaawo onapaalliiwa.

⁵ Wiivelleelle m'mattani mwa Apwiya, waaroromelle nave eneerewuupwatha.

⁶ Eneerewoonihella vaweella ohilakwa wawo, echilungamwaawo oneerowala wonanko otthaana.

⁷ Khurumuwa vamiitthoni va Apwiya, waatiyere moohikhupanya. Ohinamukhupanyaka muthu oyo ddaaye ddinamweetella phaama apaalle muthu oyo anapambana mu ddoonanara nnddo addikhozilleeye.

⁸ Rapa osha murima ni onanariwa, ohineera ddennddo vawi ddinnawiiha ddookatamiha.

⁹ Vallethi athu oonanara eneerewoonongeya, koma owaatiyera Apwiya eneerewaakhella ellapo yavatthi wi ekhalle yayiwayayiwa.

¹⁰ Mwa enthawi yooyeva muthu oonanara khakhallawo, naari muwehesese vanipuroni mvo aariiye, khamumphwanyavo.

¹¹ Koma awiithaalla eneerewaakhella ellapo yavatthi wi ekhalle yayiwayayiwa, eneerokhalla moohakallalla mwamurendelle ni mwa eyuuma.

¹² Muthu oonanara annamupanganella ddoonanara oolungama, annamuttheya moomullumella miino.

¹³ Koma Apwiya ennamuttheya oonanarooyo, vawi ennoona wi nllapo naye nawoonongeya niri vakhuviru.

¹⁴ Oonanara ennahullulla nsupada, ennakoka muura wi ewiiphe ayo eri ni ddookatamiha, oohoowa, ayo eneeta moolungama.

¹⁵ Koma nsupada niwa nineerohoma mirima dda aneeniiwa, miira ddiwa ddineerewunttakeyella m'mattani.

¹⁶ Ohoowa wa oolungama tti waphaama okhwaranya eyuuma ya oonanara.

¹⁷ Vawi Apwiya eneeromalliha masiva a oonanara, koma eneerewaallipiha oolungama.

¹⁸ Apwiya ennapwatha okumi wa athu oohilakwa, yoohallaniiwa enaakhalle wa enthawi yoohimalla.

¹⁹ Va enthawi ya ddookatamiha khewulliwa muru, va enthawi ya ettalla eneerekovona.

²⁰ Koma athu oonanara eneerotthollowa, adani a Apwiya eneeronyaalla wonanko malluwa, eneerorimeella wonanko mwiisi.

²¹ Muthu oonanara annaddivelliwa okongola koma khanawora ohokollosa, koma oolungama annakhalla ni murima waphaama ni woovaha.

²² Athu ayo Apwiya yaadalisalliiwa eneerewaakhella ellapo yavatthi, koma ayo Apwiya yaatembeleliiwa eneerewoonongeya.

²³ Apwiya ennahoollella meetello a muthu oolungama, ennaseera ettilla ddinaaddivella.

²⁴ Naari iikuha annavenya vawi Apwiya ennamuphara nnatta.

²⁵ Waambeella esombwaaka ophiyera wuulluvalla wakanngu, nginamooneke oolungama ahiyiwe ni Mulluku, apaalle edduullu ddaye ddivekaka yoocha.

²⁶ Enthawi ettheene annavaha nave annakongoliha moohummella edduullu ddaye ddinnakhalla madaliso.

²⁷ Vano hiya ddoonanara era ddaphaama, wi okhalle va ellapo yavatthi wa enthawi yoohimalla.

²⁸ Apwiya ennakonda echilungamo, kheyaahiya athwiiwa oororomelleya, eneerewaasunga wa enthawi yoohimalla, koma eneerowoonga athu oonanara.

²⁹ Oolungama eneerewaakhella ellapo yavatthi wi ekhalle yayiwa, eneerokhalla mwemmo wa enthawi yoohimalla.

³⁰ Muthu aphaama annallota ddeezeru, vayanoni vaye vinnakhuma ddoolungama.

³¹ Malamulo a Mulluku ennakhalla m'murimani mwaye, sika khanaserenguwa vaweetani.

³² Muthu oonanara annamwiipitthella oolungama, annamwaashaasha wi amwiiphe,

³³ koma Apwiya khemuhiya m'mattani mwa adanaaye, kheyaakhullella wi mullatwaaye omunanarelle.

³⁴ Atiyere Apwiya, sunga ettilla ddiwa, vano eneerewuuwelliha vawuuvahani ellapo yavatthi nave oneerowoona oonanara yoonongeyaka.

³⁵ Kaamoona oonanara akotaka iitukhullaka wonanko muteekho wa mukunguza wa o Lebanoni.

³⁶ Koma vatulli viwa kivirakattho kahoona wi khaavo, naari kamwaashaashille, ngaamuphwanyille.

³⁷ Ngoona, muthu oohilakwa nave oolungama, amurendelle ookhalla ni edduullu ddinchichi.

³⁸ Koma athu oochimwa eneerowonongeya wunchichi, edduullu ddiwa ddineerotthollowa.

³⁹ Ovullusiwa wa oolungama onavenyera wa Apwiya. Apwiya sika woothawellawo wiwa va enthawi ya ddookatamiha.

⁴⁰ Apwiya ennaakavihera ni waavullusa, ennaavenyiha m'mattani mwa oonanara, vawi athwaayo aathawella wa alliwa.