Masalimo 36 - Mawu a Mulluku

Onanara wa omuthu

Wa oohoollella wiipa. Salimo na Davide, oorumeyella a Apwiya.

¹ Machimo ennallota m'murimani mwa muthu oonanara, khanamoova Mulluku m'maganizoni mwaye.

² Anniilleka m'maganizoni mwaye, khanadduwella machimwaaye ni wiitanana.

³ Mawu avayanoni vaye tti oonanara nave oolleka, khaneerattho ddeezeru apaalle ddaphaama.

⁴ Anaganiza ddoowukila aakonaka mahiiyu, anneeta mu ettilla eyo ehiri yaphaama, khanarapa ddoonanara.

Ophaama wa Mulluku

⁵ Nyu Apwiya, echikondaanyu yoohisintheya ennaphiya oddullu, ororomelleya wanyu onnaphiya m'miraponi.

⁶ Echilungamwaanyu tti wonanko miyaango ddoorekama, echiweruzwaanyu tti wonanko enyanja yoowallamella, nyu Apwiya, munnaapwatha athu ni enama ddene.

⁷ Nyu Mulluku, echikondaanyu yoohisintheya tti yoowallamella mutengo, athu ennathawella m'muuthuuchini wa muuphellwaanyu.

⁸ Munnaachiha ddoonuna mpa mwanyu, munnaawiriha maaddi a mu muhinje wa madaliswaanyu.

⁹ Mwa nyuwaano mookhalla neetuutu a okumi, mu owala wanyu naheenettho ninnoona owala.

¹⁰ Muhinahiya echikondaanyu yoohisintheya va athu awuudduwellani, virellellani oweerella ddooddiva athu oolungama murima.

¹¹ Muhinaakhullella wi athu awiitukhulla ekinyingallelle, wi matta a athu oonanara ekiikarihe.

¹² Ngoonani, oonanara ahiikuha moogonja, mohaakhuddakulla nave khewora ovenya.