Masalimo 35 - Mawu a Mulluku

Ovekella okaviheriwa

Salimo na Davide.

¹ Nyu Apwiya, mullipanena athu oollipana ni miyaano, muwane ni athu oowana ni miyaano.

² Kusani ddawiitetezella, akuvani mukikavihere.

³ Kusani nivaka ni kottokwa, wi mullipanena athu ookithwara. Lleellani murimaaka wi, “Oovullusaawo tti miyaano.”

⁴ Evevuwe nave ewulliwe muru attheene enaashaasha okumaaka. Ehokollweelle mutulli ethawe mwanampallalla ayo enapanganella yoonanara.

⁵ Ekhalle wonanko mallulla oovava ni ephevo, mungelo a Apwiya aawiikarihaka.

⁶ Ettilliiwa ekhalle yeepiphi ni yoottherenya, mungelo a Apwiya aawaathwaraka.

⁷ Adanaayo yaakireya nikwekwe vihiri ekaamba, yaakikatella nlliti miyaano kihaallinke.

⁸ Yoonongeye moohitiyerella, yaange mu nthavi nooreya weekhiiwa, emorelle mu nlliti nookata aneeniiwa.

⁹ Sika murimaaka oneerohakallalla mwa Apwiya, othapella wi aakivullusa.

¹⁰ Kineerohakallalla ni murima muttheene kineerollota wi, “Ttaani anaaphwanaphwane ni nyu Apwiya, nyu munamuvullusa oofooka wa muthu amasiva manchichi, nyu munamuvullusa oohoowa wa muthu oomwiiyera.

¹¹ Amboni oonanara aakiwukila, ennakikoha ddeko nnddo kihinadduwelleemi.

¹² Ennakihokollosella ddoonanara va ddaphaama. Murimaaka wooddalla ni ethakaraka.

¹³ Koma miyaano adanaaka yavoriwiiwa, kaawara eziguduli wooniha omoriwa ethakaraka. Kahiillaka voohallani ocha, kaavekella kiwaramenlle vatthi,

¹⁴ wonanko mukhwaaka apaalle mbalaaka. Keeta sinosino wonanko muthu oyo aninlla maliro a amennya.

¹⁵ Koma miyaano kakwakwatuwalleemi alliwaayo yaatthukumana ehakallallaka. Ookuukutha yaakuupa, yaakuukutha moohihiyerera.

¹⁶ Athwaayo yaanavirellella okinyemulla mweepewe, enakittheya mookillumella miino.

¹⁷ Nyu Apwiya munaaweheke ophiyera niini? Kaakihereni wa athu oopaalla okoononga, muvulluse okumaaka o mikangonndda.

¹⁸ Vano kineerewuuthokozani va mutthukumano muullupalli, kineerewuutitimihani vamiitthoni va athwaanyu.

¹⁹ Muhaakhullelle wi adanaaka oolleka ehakallalle ekaamba ya ddookatamiha ddaka. Muhaakhullelle wi ayo enakiita vihiri ekaamba ekiweheke ni eserekulle mookivevulla.

²⁰ Alliwa khenallota mwamurendelle, koma enaapanganella ddoonanara ookonda murendelle.

²¹ Ennakittheya mookhuwa yootthaka wi, Hehee! Miitthwaahu ahoona nnddo ddeereyille.

²² Nyu Apwiya, moonille ddenndda, muhineera ellapo tuu! Nyu Apwiya muhinakirekamella miyaano.

²³ Nyu Mullukwaaka ni Apwiyaaka, venyani, hankoni mukiseere va mullatwaaka.

²⁴ Apwiya Mullukwaaka, ekaamba ya olungama wanyu, onihani wi miyaano tti oohilakwa, muhaakhullelle wi adanaaka ehakallalleke ekaamba ya ddookatamiha ddaka.

²⁵ Ehilloteke m'murimani mwiwa wi, ‘Napaalleehu tti ddenndda,’ Muhiwaakhullelle wi ellotekettho wi, ‘Yoolla noomugonjiha.’

²⁶ Ayo enahakallalla ekaamba ya ddookatamiha ddaka, ewulliwe muru, epallalleye muru. Ayo eneeseesa wi ekipambane, ewulliwe muru, evevuwe.

²⁷ Koma ayo enapaalla wi kiphwanyeye oohilakwa, ekhuweke moohakallalla wi, ‘Apwiya tti uullupalli, ennahakallalla oorumeyelliiwa ddamweetella phaama.’

²⁸ Miyaanottho kineerollalleya dda echilungamwaanyu, kineerewuutitimihani mallapo mattheene.”