Masalimo 34 - Mawu a Mulluku

Oreera murima wa Mulluku

Salimo na Davide, oottherihalleeye okhalla mullupa anepa vamiitthoni va Abimeleki oyo amwiikarille.

¹ Kineerewaathokoza Apwiya enthawi ettheene, vayanoni vaka vineerewaatitimiha alliwa moohihiyerera.

² Okumaaka oneerewaakotella Apwiya, oohoosiwa yiiwe nave ehakallalle.

³ Hankoni niwunnuwihe Apwiya, nitetheelle nnddina niwa.

⁴ Kaavekella wa Apwiya nave yaakaakhulla, yaakivullusa o ddittheddene kaddooveemi.

⁵ Oohoosiwa ewehille wa Apwiya, ekhove ddiwa ddaahakallalla, kheyaawulliwalle muru.

⁶ Muthu oohoowoolla ahinlla, Apwiya yaamwiiwa, emuvullusa mu ddookatamiha ddaye ddittheddene.

⁷ Mungelo a Apwiya annawaapheella athu oowoova Apwiya, annaavullusa.

⁸ Llawihani moone, Apwiya tti aphaama, oodala tti muthu oothawella wa Apwiya.

⁹ Wooveni Apwiya, nyu athwiiwa aweella, vawi ayo enawoova khenarama ello.

¹⁰ Mukango ttuurama yoocha ttuuvolliwa ettalla, koma ayo enawaashaasha Apwiya khenaramiwa ddeko ddaphaama.

¹¹ Waawoni anaaka, kiiwellelleni, kineerewuuhuddihani owoova Apwiya.

¹² Ttaani mwa nyuwaano anapaalla okumi, anaashaasha okhalla mallapo manchichi wi ahakallalle ni ddeko ddaphaama?

¹³ Sika nllumi nawo nihilloteke ddoonanara, vayanoni vawo vihikhumeke ddoolleka.

¹⁴ Orape ddoonanara nave weere ddaphaama, ashaasha murendelle ni murimaawo muttheene.

¹⁵ Miittho a Apwiya eri va oolungama maarwiiwa ennaapella winlla wiwa.

¹⁶ Koma Apwiya ennaananariwella aweera ddoonanara, vawi khewa yuupuwelleya vatthimva.

¹⁷ Athwiiwa yaawinllaka wi yaakavihere, Apwiya enniiwa ni waavullusa mu ddookatamiha ddiwa ddittheddene.

¹⁸ Apwiya ennakhalla vakhuviru ni athu ookukhumuwa, ennaavullusa athu ootathilla murima.

¹⁹ Athu oolungama ennoona ddoohoosa ddinchichi, koma Apwiya ennaavullusa mu ddittheddene.

²⁰ Apwiya ennasunga miilli dda athwaayo, khaniivo nikhuva ninapweseya.

²¹ Athu oonanara eneerewiiphiwa ni ddoonanara ddiwa, athu awiitana ni oolungama eneerollakiwa.

²² Apwiya ennavullusa okumi wa oorumeyelliiwa, khaavo oothawella wa alliwa anallakiwa.