Masalimo 33 - Mawu a Mulluku

Nchipo nowaatitimiha Apwiya

¹ Hakallallani mwa Apwiya nyu aweella murima, ddawoona, athu oolungama yaatitimiheke.

² Athokozeni Apwiya ni gitala, wiipelleni nchipo ni echida ya enthambo khumi.

³ Wiipelleni nchipo nanaanweene, kwatchani enthambonnddo mweeruso ni okhuwa moohakallalla.

⁴ Mawu a Apwiya tti awoona, ddaweera ddiwa ddittheddene tti ddoororomelleya.

⁵ Alliwa ennakonda echilungamo ni echiweruzo yoohiweha ekhove, ellapo yavatthi yooddalla ni echikondiiwa yoohisintheya.

⁶ Oddullu waaphatusiwa ni mawu a Apwiya, nndduwa, mweeri ni etheneeri ddaaphatusiwa ni mpweyiiwa.

⁷ Yahaatthukumaniha vamodda maaddi a mu enyanja yoowallamella, yaahiyella mookomella mwiwa wi ehisefukelle.

⁸ Ellapo ettheene yavatthi ewooveke Apwiya, athu attheene ookhalla mu ellapo yavatthi etthukumelleke.

⁹ Vawi alliwa yaallota nave ddaheereya, yaalamula nave ddahooneya.

¹⁰ Apwiya ennatthattusa ddoohikhalla ni mutteko, ddoolinga dda athu a mitundu, maganizwiiwa mattheene ennaatthattusa oohikhalla ni mphuro.

¹¹ Koma ddoolinga dda Apwiya ddinnakhalla wa enthawi ettheene, maganizo a m'murimani mwiwa ennakeraattheya wa enthawi yoohimalla.

¹² Woodalisiwa tti mutundu oyo Mullukwiiwa tti Apwiya, athu ayo Apwiya yaatthoonlliiwa wi tti yoohallaniiwa.

¹³ Apwiya oddullu aawarama, enaaweha athu vatthimva.

¹⁴ Nko enakhalliiwa va mpando woomwene, ennawoona athu ookhalla va ellapo yavatthi.

¹⁵ Ayo enapanga mirima dda athu attheene, tti yaayo enoona mitteko ddiwa ddittheddene.

¹⁶ Mwene khanavulluwa ekaamba ya wunnuwa wamullokwaaye wakhoto, akhoto khenavulluwa ekaamba ya waata wa masiva.

¹⁷ Muthu ahihiye murimaaye muttheene va kavalo akhoto, vawi masiviiwa manchichi khenavullusa.

¹⁸ Apwiya ennaawehera athu oowiiwellella, ootiyera echikondiiwa yoohisintheya,

¹⁹ wi yaavulluse wuukhwaani, yaasungelle okumi va enthawi ya ettalla.

²⁰ Mirima ddahu ddinnaaroromella Apwiya kaambiiwa alliwa tti nikavihero ni yawiitetezellaahu.

²¹ Mirima ddahu ddinnahakallalla mwa Apwiya, vawi ninnatiyera nnddina niwa naweella.

²² Nyu Apwiya echikondaanyu yoohisintheya ekhalle va hiyaano kaambiiwa ninnuuroromellani nyuwaano.