Masalimo 32 - Mawu a Mulluku

Dda owulula machimo ni okhululuka

Endakatulo ya Davide.

¹ Oodalisiwa tti oyo machimwaaye ekhululukiwe, oyo ddoonanara ddaye ddivuhellelliwe.

² Oodalisiwa tti oyo Apwiya ehinamweerengelliiwa mullatwaaye, oyo m'murimani mwaye muhiri ddoolleka.

³ Kaariimi kihinawulule machimwaaka, mwiillaaka waari woofooka, ekaamba ya winlla nllapo nittheene.

⁴ Vawi otthaana ni misikuwa nnatta nanyu naakiwatakanya, masivaaka yaamalla wonanko makattha mu ellimwe.

⁵ Koma kaawulula machimwaaka, ngaavitthalle onanara waka. Kaallota wi, “Kineerowulula machimwaaka wa Apwiya,” vaavo mwaakhululuka mullatwaaka.

⁶ Sika muthu oolungama avekelle wa nyuwaano mu enthawi eyo munaphwanyeyeenyu. Maaddi oosefukella yaphiya, khemuphwanya olliye.

⁷ Nyuwaano tti woothawellawo waka, munnakiteteza mu ddookatamiha, munnakaapheelliha ni okhuwa wa ovullusa.

⁸ Apwiya enallota wi, “Kineerewuulleella ni wuuhuddiha ettilla eyo onaaweetekeewemo. Kineerewuulangiza nave miitthwaaka eneerokhalla va weyaano.

⁹ Muhikhalle athu ookarangeya wonanko kavalo apaalle bulu, oyo anookollelliwa ni mukoko wa muwano owaaka mukwe va muru, kaambiiwa waaheera ddiiddo khiiwellella.

¹⁰ Muthu oonanara annakumana ni ddookhoma ddinchichi, koma muthu awaaroromella Apwiya annaapheelliwa ni echikondi yoohisintheya.

¹¹ Nyu athu oolungama, hakallallani ni othapella mwa Apwiya, nyu athu ooreera murima, khuwani moohakallalla.”