Masalimo 30 - Mawu a Mulluku

Nivekello noothokoza

Nchipo nawiipiwa vooyivelleellani enyumba ya Mulluku. Salimo na Davide.

¹ Kineerewuutitimihani, nyu Apwiya, vawi mookikhumiha ovenyera moowallamella. Khamwaakhullenlle wi adanaaka ehakallallelle ohoosiwa waka.

² Apwiya Mullukwaaka, kahinlla wi mukikavihere nave mwaakichiriha.

³ Nyu Apwiya, mookikhumiha mu ellapo ya ookhwa, mookihokollosella okumi wi kihikitthelle o mahame.

⁴ Nyu athwiiwa aweella, ipani machipo awaatitimiha Apwiya, athokozeni ekaamba ya weella wiwa.

⁵ Onanariwa wiwa tti wa enthawi yooyeva, oreera murima wiwa tti wa okumi muttheene. Naari miitthori ddimoraka mahiiyu mattheene, ohinase onnakhalla ohakallalla.

⁶ Koma miyaano ddeko ddakeetelliiwa phaama kaallota wi, “Ngiwa kitikheya naari vang'ono.”

⁷ Ekaamba ya oreera murima wanyu, nyu Apwiya, mwaakikeraatthiha wonanko mwaango woollipa. Koma mwiipitthihalleenyu ekhovaanyu kaatathilla murima.

⁸ Vano kaawinllellani Apwiya, kaaveka echifundwaanyu wi,

⁹ “Ethiyo munaaphurevo tini va okhwa waka kakitthella o mahame? Ethiyo athu yatthattuwa nthupi ttuuwuutitimihani? Ethiyo ttuullalleya dda ororomelleya wanyu?”

¹⁰ “Nyu Apwiya, kiiweni nave mukeerelle echifundo. Nyu Apwiya, mukhalle ookikaviheraaka.”

¹¹ Mootthattusa winlla waka wi okhalle wiina, mookivenyihella ethakarakaaka mukivaha ehakallallo.

¹² Sika ngikhalla ellapo tuu, koma kineerewuutitimihani ni murimaaka muttheene. Apwiya nyuwaano tti Mullukwaaka, kineerewuuthokozani wa enthawi yoohimalla.