Masalimo 27 - Mawu a Mulluku

Nivekello nowaatitimiha Apwiya

Salimo na Davide.

¹ Apwiya sika owala waka ni oovullusaaka. Ttaani kinaamoovekeemi? Apwiya sika mpanda wooteteza okumaaka. Ttaani kinaamutthukumellellekeemi?

² Athu aweera ddoonanara yaawa wa miyaano wi ekiiphe, adanaaka yaakithwaraka manyallo ennakwakwatuwa ni wiikuha.

³ Naari mulloko wakhoto okaapheelle, murimaaka khotthukumella naari vang'ono. Naari ekhoto enyanyuwe ollipana ni miyaano, ngihiya wuuroromellani.

⁴ Kinaveka ello emodda wa Apwiya, ello yoopaalleya wunchichi, yawi kikhalleke mu enyumba ya Apwiya, mallapo mattheene a okumaaka, wi kihakallalleke ni oreera murima wa Apwiya, wi kaallapelleke alliwa mu enyumbiiwa.

⁵ Va nllapo na ddookatamiha eneerokivittha, eneerokisunga muwari mwa enyumbiiwa, eneerokiteteza vanllukuni noorekama.

⁶ Kineerewaapambana adanaaka ookaapheella, kineerovelleella mukutho mu enyumbiiwa, kineerokhuwa ni ohakallalla, kineerewiipa ni waatitimiha Apwiya.

⁷ Nyu Apwiya, iwani winlla waka wookhuwa, mukeerelle echifundo nave mukaakhulle.

⁸ Kinnuupuwella, mwaallota wi, “Mwaashaasheke ekhovaaka.” Murimaaka waallota wi, “Nyu Apwiya kinnaashaasha ekhovaanyu.”

⁹ Muhikiipitthihelle ekhovaanyu. Muhikikhoote moonanariwa mi oorumeyellaanyu. Nyuwaano mookhalla mukikaviheraka. Muhikitathille, muhikihiye meekha, nyu Mulluku oovullusaaka.

¹⁰ Naari attiitthaaka ni amoowaaka ekihiye meekha, nyu Apwiya muneerokipwatha.

¹¹ Nyu Apwiya kihuddiheni ettilla ddanyu, kihoollelleni mu ettilla ddoosalala kaambiiwa kookhalla ni adani anchichi.

¹² Muhikihiye m'mattani mwa adanaakaayo. Amboni awoottha aakuupa, ennakoopopiha.

¹³ Kahikhulupililalleke wi koone oreera murima wa Apwiya, mu ellapo ya ookumi, kaaweere tini!

¹⁴ Vano atiyere Apwiya. Khalla amasiva nave ollipe murima. Ddawoona, atiyere Apwiya.