Masalimo 26 - Mawu a Mulluku

Nivekello na muthu oolungama

Salimo na Davide.

¹ Nyu Apwiya, kamullani wi ngilakwille moollikana ni echilungamwaaka vawi miyaano tti oohilakwa, kohuuroromellani moohikayika.

² Nyu Apwiya, mukiwehesese nave mukeese, moone murimaaka ni maganizwaaka.

³ Echikondaanyu yoohisintheya ennakihoollella, kinneeta mu ororomelleya wanyu.

⁴ Nginakhalla ni athu oolleka, ngineeta ni athu awoottha.

⁵ Kinniitana ni athu aweera ddoonanara, nginakhalla ni athu oochimwa.

⁶ Kinnanawa wooniha wi ngichimmwe, kinnuullapellani va nikuwa nanyu na mukutho, nyu Apwiya.

⁷ Kinniipa nchipo noothokoza, kinnallalleya mitteko ddanyu ddoottikhiniha.

⁸ Nyu Apwiya, kinnakonda enyumba eyo munakhalleenyumo, onipuroni nko ori ntitimiho nanyu.

⁹ Muhikitathillelle nimodda ni oochimwa, muhikivenyihelle okumi nimodda ni awiipha,

¹⁰ ayo mattiiwa eneera ddoonanara, ayo nnattanatta niwa niddanlle ni ddamukaphwani.

¹¹ Koma miyaano kinneeta moolungama. Mukeerelle echifundo nave mukivulluse.

¹² Kookeraattheya vanipuroni noohikatamiha, kineerewaatitimiha Apwiya va mutthukumano muullupalli.